ITINULAK ni Sen. Francis “Chiz” Escudero ang mabilisang paggamit ng digital passenger manifests upang magkaroon ang mga awtoridad ng tama at agarang talaan ng mga sakay ng barko kapag may sakuna.

Ito’y kasunod ng pagkasunog ng MV June Aster sa karagatan ng Coron, Palawan noong Setyembre 9 habang patungo ito sa Coron mula Maynila.

“What happened to MV June Aster shows why we must accelerate and expand the rollout,” ani Escudero.

May 134 katao sa orihinal na manifest. Kalaunan ay kinumpirma ng Philippine Coast Guard (PCG) na dalawa sa listahan ang hindi sumakay: ang isa ay hindi umabot sa pag-alis ng barko at ang isa ay nag-eroplano.

Dahil dito, 132 katao ang kumpirmadong nakasakay. Sa tala ng PCG nitong Linggo, 76 ang nasawi, 43 ang nakaligtas at 13 ang nawawala.

Naglabas ang Maritime Industry Authority (MARINA) ng mga patakaran para sa mandatoryong Shipping Online Ticketing System o SOTS sa mga inter-island passenger ship.

Layunin ng sistema na gawing digital ang pagbili ng tiket at awtomatikong makabuo ng listahan ng mga pasahero at tripulante na magagamit ng mga awtoridad sa oras ng emerhensiya.

Gayunman, sinabi ni Escudero na hindi pa pantay ang pagpapatupad ng digital system sa mga pantalan sa bansa.

“Kung ang aviation ay may mahigpit na real-time digital passenger manifest, dapat ganito rin ang pamantayan sa ating maritime sector,” sabi ng senador.

Ayon kay Escudero, mapabibilis ng digital manifest ang pagtukoy sa aktuwal na bilang at pagkakakilanlan ng mga pasahero at tripulante sa mga operasyon sa paghahanap, pagsagip at pagbawi.

Hiniling din niya ang mabilisang imbestigasyon sa insidente at pagsusuri sa mga kagamitang panlaban sa sunog, pagsasanay ng mga tripulante, kondisyon at kakayahan ng mga barkong maglayag nang ligtas, at pagpapatupad ng mga regulasyon sa kaligtasang pandagat.

Ayon sa PCG, pumasa ang MV June Aster sa Vessel Safety Enforcement Inspection noong Marso 2026 at sumailalim din sa Emergency Readiness Evaluation bago ang insidente.

Iniimbestigahan pa ang sanhi ng sunog at kung nasunod ang mga itinakdang hakbang sa emerhensiya. Wala pang pinal na konklusyon na overloaded ang barko o may mga sakay na hindi kasama sa manifest.

Nagpaabot din si Escudero ng pakikiramay sa mga naulila at nanawagan sa mga ahensiya ng pamahalaan at may-ari ng barko na tulungan ang mga pamilya ng mga biktima at ang mga nakaligtas na ginagamot sa mga ospital.