SINABI ni Sen. Risa Hontiveros sa pamahalaan na bilisan ang pagbibigay ng ayuda at service contracting at kailangang mapigil ang krisis sa antas pa lamang ng transportasyon bago pa kumalat sa presyo ng pagkain, kabuhayan, at araw-araw na gastusin ng mga pamilya.

Sinabi ni Hontiveros na ramdam na sa aktuwal na buhay ng mga public utility vehicle driver, trucker, magsasaka, mangingisda at commuter ang krisis habang lumalagpas na sa P130 kada litro ang presyo ng diesel.

“So sa presyo ngayon na humigit sa P130 per liter sa diesel, yung ating mga PUV drivers ay malulugi ng P1,500 kada araw ng pasada.

So umabot na rin ito sa ating mga trucking at saka logistic sector na nagdadala ng mga pagkain at iba pang pangunahing pangangailangan sa mga ports at farm sa probinsya, baka kalaunan pati yung mga magsasaka’t mangingisda natin ay tumigil na magtanim o pumalaot,” sabi ni Sen. Hontiveros.

Sumang-ayon si Department of Economy, Planning, and Development Secretary Arsenio Balisacan na sentro ng pambansang tugon ang mobility, at sinabing ang paghina ng transportasyon ay maaaring kumalat sa iba pang sektor ng ekonomiya, kabilang ang kalusugan at edukasyon.

Ayon kay Hontiveros, iyon mismo ang nais pigilan ng komite, ngunit kailangan na ngayong maglatag ang pamahalaan ng mas malinaw na bilang at mas mabilis na aksyon, lalo na’t ikatlong pagdinig na ito tungkol sa usapin.

Iginiit niya na kailangang manatiling umaandar ang transportasyon para sa mga pamilya at manggagawa sa halip na hintayin pang lumaki ang pangangailangan sa mas malalaking cash aid kalaunan.

Binanggit ng senador na kulang ang kasalukuyang P1 bilyong nakalaan para sa service contracting, habang humihiling ang Department of Transportation ng karagdagang P5 bilyon upang matustusan ang susunod na tatlong buwan.

Sinabi ni DOTr Undersecretary Mark Steven Pastor na ilulunsad ng ahensya sa Abril 15 ang service contracting na sasaklaw sa humigit-kumulang 823 ruta sa buong bansa.

Tinukoy rin ni Hontiveros ang mga posibleng inobasyon mula sa pribadong sektor, kabilang ang mga kaayusang maaaring tumulong ang mga kumpanya sa pagsagot sa bahagi ng gastusin sa transportasyon ng mga manggagawa habang sinusuportahan ng pamahalaan ang service delivery mechanisms.

Hiniling din niya ang mas malinaw na tantiya kung magkano pa ang kakailanganing suporta hindi lamang para sa transportasyon kundi pati sa logistics, mga magsasaka, mangingisda, at mga bulnerableng sambahayan, at sinabing kailangan ng mga mambabatas ng matitibay na numero upang makatulong sa paglalaan ng dagdag na tulong.

Ayon kay Balisacan, maaaring makatulong ang 2026 General Appropriations Act at ang continuing 2025 budget upang matustusan ang susunod na tatlong buwan kung magiging tutok at maayos ang pag-target ng suporta.