SINABI ni Senador Alan Peter Cayetano nitong Lunes na mas nais niyang tawaging “West Philippine Sea” ang pinag-aagawang teritoryo kaysa sa iminumungkahing “Sea of Asia” para malinaw aniya kung sino ang may karapatan sa teritoryo.

Sa isang panayam sa mga miyembro ng media nitong October 31, 2023, sinabi ni Cayetano na may ilang magandang katangian ang mungkahi ni Justice Secretary Jesus Crispin “Boying” Remulla na palitan ang pangalan ng pinagtatalunang teritoryo bilang “Sea of Asia.”

“Maganda po y’ung idea ni Secretary Boying if just to emphasize that 71 percent of the world is water and that napakaimportante na ‘wag tayong mag-away-away diyan kundi magtulungan,” ani Cayetano.

Gayunpaman, pagdating sa paninindigan sa karapatan ng Pilipinas ayon na rin sa 2016 Arbitral Ruling Award, mas mainam aniya kung patuloy nating tatawaging “West Philippine Sea” ang teritoryo.

Opisyal na tinawag na West Philippine Sea ang teritoryo noong September 5, 2012 sa pamamagitan ng Administrative Order No. 29 na pinirmahan ni President Benigno Aquino III.

Pahayag ni Cayetano, siya mismo ay “West Philippine Sea” ang ginagamit tuwing nakikipag-usap sa mga world leader at mga opinion-maker noong nanunungkulan pa siya bilang Secretary of Foreign Affairs noong 2017-2018.

“In fact one of the former American Secretary of States, sabi niya, ‘Oh, that (West Philippine Sea) is interesting. Yes, we should start using that,” aniya.