PATAY ang 20-anyos na college student sa Novaliches, Quezon City noong Lunes ng barilin ng suspek na nakatakas.

Nakilala ang biktima na si Edwin Pinas Inocencio Jr., ng Block 1, Lot 6, Tawid Sapa II, Phase 2, Brgy. Kaligayahan, Novaliches, Quezon City.

Nakatakas ang suspek na si Jerome Reyes Delos Reyes, 23, ayon sa report.

Sa report ng Criminal Investigation and Detection Unit ng Quezon City Police District (CIDU-QCPD), bandang alas-7:00 ng gabi naganap ang insidente sa harap ng Vargas Multi-Purpose Hall sa Phase 1, Tawid Sapa 2, Brgy. Kaligayahan, Novaliches.

Batay sa imbestigasyon ni P/Cpl Ghino B Galit, nag-uusap sa harap ng multi-purpose hall ang biktima at kaibigang si alyas Daniel nang mapansin nila na nagmamadaling lumapit sa kanila ang suspek na armado ng baril.

Dahil sa takot, tumakbo ang biktima at ang kaibigan sa magkaibang direksyon pero hinabol ng suspek ang una at saka pinagbabaril. Nang duguang bumagsak ang biktima, naglakad lang ang suspek at tumakas.

Isinugod ng kaibigan ang biktima sa Commonwealth Hospital subalit idineklarang dead-on-arrival dakong 7:17 ng gabi, ayon kay Dr. Noli Refareal, dahil sa mga tama ng bala sa kanang balikat.