NAKIPAGTULUNGAN ang isang mambabatas sa Department of Trade and Industry (DTI) sa pamamagitan ng Small Business Corporation (SB Corp) upang palawakin ang access ng maliliit na negosyo sa abot-kayang pautang—na may mababang interes at walang kailangang kolateral—bilang tulong sa mga Pilipinong negosyante na makawala sa mapagsamantalang “5-6” na sistema ng pagpapautang na matagal nang nagpapalubog sa kanila sa utang.

Ang sistemang 5-6, kung saan naniningil ng labis na interes ang mga hindi pormal na nagpapautang—madalas umaabot sa 20 porsiyento—ay matagal nang pasanin ng maraming micro, small, and medium enterprises (MSMEs) na hirap makakuha ng pormal na pautang sa mga bangko.

Upang tugunan ito, ang SB Corp, isang ahensiyang pampinansyal ng pamahalaan na itinalagang magpautang sa MSMEs, ay magbibigay ng makatarungan at pangmatagalang alternatibo.

Sa ilalim ng programa, maaaring makautang ang mga negosyante ng mula ₱30,000 hanggang ₱3 milyon, na babayaran sa loob ng hanggang tatlong taon, may 1 porsiyentong taunang interes lamang, at walang kolateral.

Tatanggap ng mga aplikasyon sa Business Loan Roadshow sa Nobyembre 11 sa West Triangle Multipurpose Building, Quezon City.

“Ito ang tunay na alternatibo sa 5-6 lending—makatarungan, makatao, at maka-Pilipino,” ayon kay BH Party-list Rep. Robert Nazal.

“Binibigyan natin ng pagkakataon ang maliliit na negosyante na umunlad nang hindi nalulubog sa utang,” dagdag pa niya.

Kailangan lamang magsumite ang mga aplikante ng government-issued ID, business permit (barangay certification, Barangay Micro Business Enterprise (BMBE) certificate, o mayor’s permit), at patunay ng bank account.

Para sa mga pautang na lampas ₱100,000, kinakailangan ang postdated checks. Ang pre-assessment ay bukas hanggang Nobyembre 8, at unang 150 aplikante lamang ang bibigyang-priyoridad.

“Ang pakikipagtulungang ito ay nagbibigay sa mga negosyante ng kapital na nagbibigay-lakas, hindi umaabuso,” ayon kay dating BH Rep. Bernadette Herrera, na kilalang tagapagtanggol ng MSMEs.

“Ang pautang ay dapat tulay tungo sa pag-unlad, hindi pabigat na nagkukulong sa kahirapan,” diin pa ni Herrera.

Sinabi rin niya na ang inisyatibong ito ay sumasalamin sa misyon ng Bagong Henerasyon (BH) Party-list na bumuo ng ekonomiyang inklusibo—para sa lahat, hindi lamang sa mga may pribilehiyo.

Binigyang-diin ni Herrera na ang mga MSMEs ay bumubuo ng higit 99 porsiyento ng mga negosyo sa Pilipinas at mahalaga sa paglikha ng trabaho at pag-unlad ng mga lokal na komunidad.

“Kapag tinulungan natin ang maliliit na negosyo na umasenso, pinatatag din natin ang mga pamilya, komunidad, at ang pambansang ekonomiya,” ani Herrera.

Hinimok naman ni Rep. Nazal ang mga nagnanais magnegosyo na makibahagi sa roadshow upang makakuha ng makatarungang puhunan para sa kanilang negosyo.

“Hindi lang ito simpleng loan program, ito ay lifeline para sa bawat Pilipinong nangangarap na magtagumpay,” ani Nazal.

Para sa mga katanungan at detalye ng pre-assessment, bumisita sa opisyal na Facebook page ng Bagong Henerasyon Party-list.