SINUSPINDI ng Land Transportation Office (LTO) ang driver’s license ng isang opisyal ng LTO sa Zamboanga Peninsula dahil sa reckless driving na nagresulta sa malalang aksidente.

Inutusan na ni LTO Chief Assistant Secretary Atty. Vigor D. Mendoza II ang LTO official na naka-assign sa Human Resources and Management Office ng LTO Regional Office 9 na isuko ang lisensya niya kay LTO Regional Director Roderick Minong.

“This is proof that we neither condone nor tolerate traffic regulations violations within our ranks.

As a member of the LTO family, it is our obligation to be the model of road safety and responsible driving,” sabi ni Asec Mendoza.

Nag-isyu na din si Asec Mendoza ng show cause order (SCO) laban sa sinuspindeng LTO official bilang pagtalima sa utos ni President Ferdinand “Bongbong” R. Marcos, Jr. na gawing ligtas ang lahat ng kalsada laban sa mga tolongges at kamote drivers at riders.

Ayon sa investigation, nagmamaneho ng pick-up truck mula Pagadian City papuntang Zamboanga City ang suspek nang biglang humarurot ng takbo.

Dahil sa bilis, swak sa swamp ang pick na ngayo’y viral online.

Hindi tiyak kung lasing ang LTO official at isa ito sa tututukan sa gagawing imbestigasyon sa insidente sa pangunguna ni LTO Intelligence and Investigation Division chief Renante Melitante.

Nahaharap ang LTO official sa mga kasong reckless driving at improper person to operate a motor vehicle.