SINABI ni Atty. Dino De Leon, abogado para sa pampublikong interes at tagapangulo ng Team Pinas, na naghahanda ang mga public interest lawyer ng posibleng reklamo sa usurpation of authority laban sa mga personalidad na diumano’y kumikilos sa ilalim ng awtoridad ng Senate Blue Ribbon Committee, kahit wala silang sapat na bilang upang gawin ito.

Sa kanyang pananalita sa Saturday News Forum sa Dapo Restaurant sa Quezon City, sinabi ni De Leon na ang mga grupo ng public interest lawyers ay kasalukuyang nagkukunsulta tungkol sa posibleng legal na aksyon laban sa tinaguriang peke na pamunuan ng Blue Ribbon.

“Hindi lang Tindig Pilipinas, ang aking grupo, hindi lang Bantay Senado, hindi lang Team Pinas, advocates ng public interest law…Basically, lahat ng grupong ito ay kasalukuyang nagkukunsulta. Pero sigurado, ako mismo ay naghahanda na para maghain ng kaso,” dagdag niya.

Sinabi ni De Leon na ang posibleng reklamo ay hindi lamang tungkol sa paninirang-puri.

“Pero ‘di lang ito liable, ‘di lang ito slander. Ito ay usurpation of authority,” sabi ni De Leon.

Aniya, ang isyu ay ang diumano’y paggamit ng awtoridad ng komite nang walang legal na batayan.

“Ang kaso ay tungkol sa usurpation of authority sa pagiging pamunuan ng Blue Ribbon kasi sinasabi nila na sila ay Blue Ribbon, pero hindi naman,” sabi ni De Leon.

“Nagkukunwaring may awtoridad ng Blue Ribbon Committee pero wala naman pala,” dagdag niya.

Sinabi ni De Leon na ang kanyang grupo ay binubuo ng mga batang abogado na naghahanda ng posibleng reklamo.

“Tinutukoy namin ang grupo namin bilang angry lawyers,” sabi ni De Leon.

“Yung mga batang abogado na nagagalit sa pambababoy sa ating sistema,” dagdag niya.

Aniya, kasalukuyang tinatapos ng mga abogado ang listahan ng mga nagrereklamo.

“Kaya may grupo tayo ng angry lawyers na nag-draft at naghahanda kung sino mismo ang mga complainants,” sabi ni De Leon.

“Matatapos namin ito ngayong linggo, at magbibigay kami ng anunsyo sa tamang panahon,” dagdag niya.

Sinabi ni De Leon na ang posibleng reklamo ay malamang ihahain sa Ombudsman at sa Senate Ethics Committee.

“Most probably, ihahain ito sa Ombudsman, at siyempre sa Senate Ethics Committee,” sabi ni De Leon.