NAGPAHAYAG ng pangamba si Senate President Pro Tempore Panfilo “Ping” Lacson matapos aminin ng National Irrigation Administration (NIA) sa deliberasyon ng badyet sa Senado na wala ni isa sa 257 irrigation systems nito ang ganap na operational. Sinasaklaw ng mga ito ang humigit-kumulang 1.03 milyong ektarya ng sakahan.

Sa pagdinig, tinanong ni Lacson kung ilang sistema ang “fully operational.”

Ayon kay Senator Francis “Kiko” Pangilinan, tagapagsulong ng budget ng NIA, iniulat ni NIA Administrator Eddie Guillen na gumagana ang lahat ngunit hindi sa buong kapasidad dahil sa siltation sa mga ilog na pinanggagalingan ng tubig.

Idinagdag ni Pangilinan na may mas malawak itong epekto, at sinabi niyang nakadepende ang suplay ng pagkain sa maayos na produksiyon sa bukid, na nangangailangan ng sapat na patubig.

Ayon sa kanya, kapag bumababa ang ani dahil sa kulang na irigasyon, maaari itong makaambag sa pagtaas ng food inflation, lalo na para sa mga pangunahing bilihin tulad ng bigas.

Tinukoy naman ni Lacson ang P7.6-bilyong Balog-Balog Multipurpose Project Phase II sa Tarlac, na pinondohan mula 2015 hanggang 2022 at layuning pagandahin ang suplay ng patubig sa pamamagitan ng high dam at diversion tunnel.

Ipagpapatuloy ng Senado ang pagsusuri sa performance targets ng NIA at sa mga hakbang upang matugunan ang siltation at mapahusay ang operasyon ng mga sistema ng irigasyon.