TATAAS sa ikalimang sunod-sunod na linggo ang presyo ng gasolina at kerosene ng P1 kada litro at 80 sentimos kada litro naman sa diesel simula Martes ng umaga.

Ito ang price adjustment na abiso ng PTT Philippines, PetroGazz, Total Philippines at Unioil Philippines simula alas-6:01 ng umaga habang alas-4:01 ng hapon ang simula ng price increase ng Clean Fuel.

Nauna ng nag-anunsiyo ang Petron Philippines, Pilipinas Shell at Chevron Philippines ng malakihang dagdag presyo ng kanilang mga produktong petrolyo.

Sinabi ni PTT Philippines Media Relation Officer Jay Julian na ipinatutupad ng mga kompanya ng langis ang pagtataas sa presyo ng mga produktong petrolyo sa dikta ng presyuhan ng langis sa pandaigdigang pamilihan.