LOS ANGELES, California — Handog ng Philippine Consulate General sa Los Angeles at GMA Public Affairs/GMA Pictures ang screening ng doku-animated film na “58th” sa Laemmle Theatres sa Glendale, California mula Oktubre 23 hanggang 29.

Idinirek ni Carl Joseph Papa ang kwento ng mga biktima ng trahedya noong 2009 Maguindanao massacre.

Dito rin ibinida ang laban ng pamilya ni Reynaldo “Bebot” Momay para opisyal siyang kilalanin bilang ika-58 biktima ng brutal na pamamaril.

Hindi lang sa Pilipinas namamayagpag ang pelikula, hinangaan din ito sa Busan International Film Festival at Annecy International Animation Film Festival.

Hakot-parangal din ito sa 2026 Manila International Film Festival kung saan pinalad itong makuha ang Best Documentary Picture, Best Director at Shining a Light Award
Sa suporta ng Film Academy of the Philippines (FAP).

Target din ng 58th na makapasok sa 2027 Academy Awards (Oscars) sa kategoryang Best Documentary Feature Film.

Kaisa sa pagdiriwang ng Filipino American History Month, inaanyayahan ang mga kababayan natin sa Southern California na sumuporta at panoorin ito.