PAGKATAPOS ng sine-die adjournment ng Kongreso. Balik naman si House Deputy Speaker at Cebu 5th Dist. Cong. Vincent Franco “Duke” D. Frasco sa pagtutok sa kaniyang Distrito matapos nitong pangunahan ang pagkakaloob ng scholarship para sa mga estudyante ng Compostela at Danao City.

Personal na tinungo ng House Deputy Speaker ang Munisipalidad ng Compostela upang mamahagi ng scholarship grants sa pangunguna ng “Team Frasco” para sa libo-libong mag-aaral ng nasabing lugar kabilang na ang mga estudyante ng Danao City para sa school year 2023 at 2024.

Nabatid kay Frasco na ginanap ang nasabing programa sa Municipal Gym ng Compostela upang mamahagi sila ng scholarship grants na nagkakahalaga ng P8,800 para sa tinatayang 2,200 estudyante. Habang nagpa-raffle din sila ng laptop para sa mga masuwerteng mananalo.

Sinabi ng kongresista na sa tuwing magkakaroon ng session break ang Kamara de Representantes. Tinututukan nito ang kaniyang Distrito para maipagpatuloy ang kaniyang mga proyekto na magbibigay ng malaking tulong at kaginhawahan para sa kaniyang mga kababayan lalo na ang mga estudyante.

Ayon kay Frasco, hindi lang naman ang paghahain ng panukalang batas ang trabaho nilang mga kongresista. Kundi ang pagsusulong ng mga proyekto na malaki ang maitutulong sa kanilang mga kababayan.