𝗦𝗔 𝗞𝗔𝗕𝗜𝗟𝗔 𝗻𝗴 𝗺𝗮𝗵𝗶𝗴𝗽𝗶𝘁 𝗻𝗮 𝘀𝗰𝗵𝗲𝗱𝘂𝗹𝗲 𝗻𝗶 𝗛𝗼𝘂𝘀𝗲 𝗗𝗲𝗽𝘂𝘁𝘆 𝗠𝗮𝗷𝗼𝗿𝗶𝘁𝘆 𝗟𝗲𝗮𝗱𝗲𝗿 𝗮𝘁 𝗜𝘀𝗮𝗯𝗲𝗹𝗮 𝟲𝘁𝗵 𝗗𝗶𝘀𝘁. 𝗖𝗼𝗻𝗴. 𝗙𝗮𝘂𝘀𝘁𝗶𝗻𝗼 “𝗜𝗻𝗻𝗼” 𝗔. 𝗗𝘆 𝗩 𝗸𝗮𝘀𝗮𝗯𝗮𝘆 𝗻𝗴 𝗴𝗶𝗻𝗮𝗴𝗮𝗻𝗮𝗽 𝗻𝗮 “𝗯𝘂𝗱𝗴𝗲𝘁 𝗯𝗿𝗶𝗲𝗳𝗶𝗻𝗴” 𝘀𝗮 𝗞𝗼𝗻𝗴𝗿𝗲𝘀𝗼, h𝗶𝗻𝗱𝗶 𝗽𝗮𝗿𝗶𝗻 𝗻𝗶𝘁𝗼 𝗻𝗮𝗸𝗮𝗸𝗮𝗹𝗶𝗴𝘁𝗮𝗮𝗻 𝗮𝗻𝗴 𝗽𝗮𝗴𝘁𝘂𝘁𝗼𝗸 𝘀𝗮 𝗺𝗴𝗮 𝗶𝗻𝗶𝗹𝘂𝗻𝘀𝗮𝗱 𝗻𝗶𝘁𝗼𝗻𝗴 𝗽𝗿𝗼𝘆𝗲𝗸𝘁𝗼 𝗽𝗮𝗿𝗮 𝗺𝗮𝗽𝗮𝗸𝗶𝗻𝗮𝗯𝗮𝗻𝗴𝗮𝗻 𝗻𝗴 𝗸𝗮𝗻𝗶𝘆𝗮𝗻𝗴 𝗺𝗴𝗮 𝗸𝗮-𝗹𝗮𝗹𝗮𝘄𝗶𝗴𝗮𝗻.

Pinangunahan ng House Deputy Majority Leader ang inagurasyon ng ipinagawa nitong multi-purpose building project para sa Barangay Silauan Sur Echage, Isabela na nagkakahalaga ng P2.9 million para mapakinabangan ng kaniyang mga kababayan.

Ayon kay Dy, ang nasabing multi-purpose building ay isa lamang sa mga nakahilerang proyekto nito para matulungan ang kaniyang mga kalalawigan na magkaroon ng kombinyenteng pasilidad na maaari nilang pakinabangan kabilang na ang pagpapatayo ng mga bagong paaralan.

Paliwanag ni Dy, sa kasalukuyan ay abalang-abala ang Kamara de Representantes dahil sa isinasagawang budget deliberation para sa lahat ng ahensiya ng pamahalaan upang ilatag ang kanilang proposed national budget para sa susunod na taon (2025).

Sinabi ng kongresista na sa kabila ng kaniyang mahigpit na schedule. Hindi pa rin nito nakakaligtaan na tutukan ang mga ikinasa nitong “infrastructure projects” sa kaniyang Distrito upang hindi matengga o kaya’y magkaroon ng delay sa paghahatid niya ng serbisyo.

Dagdag pa ni Dy na naging katuwang nito ang Department of Public Works and Highways (DPWH) at Local Government Unit (LGU) ng Echague sa pangunguna ni Mayor Kiko Dy.