ISANG 16-anyos na lalaking estudyante ang inaresto ng mga rumespondeng pulis sa bayan ng Tupi, South Cotabato matapos mahulihan ng isang 9mm na pistola na kalaunan ay napag-alamang nakatalaga sa kanyang nakatatandang kapatid na isang sundalo ng Hukbong Katihan ng Pilipinas.

Ayon kay Police Regional Office 12 (PRO12) Director, Brigadier General Alan B. Manibog, naharang ang menor de edad sa kahabaan ng national highway sa Purok Candelaria, Barangay Poblacion, Tupi bandang alas-6:00 ng gabi noong Miyerkules.

Limang minuto bago ito, nakatanggap ang Tupi Municipal Police Station ng ulat mula sa isang empleyado ng lokal na pamahalaan hinggil sa isang estudyanteng may dalang baril sa naturang kalsada.

Nang sitahin ng mga nagpapatrolyang pulis, narekober sa estudyante ang isang Glock 17 9mm semi-automatic pistol na may serial number na AFP015327. Ang naturang baril ay nakatalaga sa kanyang nakatatandang kapatid na may ranggong Corporal at miyembro ng 6th Infantry Battalion ng Philippine Army.

May nakakabit na magasin ang baril na may lamang 16 na bala, at mayroon ding ekstrang magasin na may 16 pang bala.

Nakatira ang estudyante kasama ang kanyang kapatid sa loob ng himpilan ng 6th Infantry Battalion sa Barangay Kablon. Ayon sa sundalo, kinuha umano ng kanyang kapatid ang kanyang service firearm nang wala siyang kaalaman o pahintulot.

Dinala muna ang menor de edad sa himpilan ng pulisya bago ito isinailalim sa pangangalaga ng Tupi Municipal Social Welfare and Development Office.

Inihahanda na ang kasong paglabag sa Republic Act No. 10591 o ang Comprehensive Firearms and Ammunition Regulation Act of 2013 laban sa akusado para sa pagsasampa nito sa South Cotabato Prosecutor’s Office.