BINONDO – Naging sentro ang pananampalataya at komunidad noong Marso 27, bago ang Mahal na Araw, sa pagbabasbas at pagbubukas ng Felicidad T. Sy Pastoral and Youth Center sa Minor Basilica at Pambansang Dambana ni San Lorenzo Ruiz.

Sa loob ng mahigit apat na siglo, nagsilbing saksi ang lugar sa debosyon, na ang pinagmulan ay umaabot pa noong 1596. Nanatiling matatag ang parokya sa paglipas ng panahon, ngunit ang dating gusali—na itinayo noong huling bahagi ng dekada 1960—ay napabayaan na. Pinangunahan ng Felicidad T. Sy Foundation Inc. (FTSFI) ang muling pagpapaunlad, at ginawang isang makabagong apat na palapag na pasilidad ang lumang istruktura.

Pinangunahan ni Jose F. Cardinal Advincula, Arsobispo ng Maynila, ang seremonya ng pagbabasbas, kasama ang mga lider ng parokya at ang pamilyang Sy. Sa kanyang mensahe, inilarawan ng Kardinal ang sentro bilang isang “banal na lugar—isang tahanan kung saan naghihilom ang pagkakapatiran,” at binigyang-diin ang papel nito bilang kanlungan ng mga pari at lugar para sa muling pakikipag-isa.

Ibinahagi ni Parish priest Msgr. Esteban Lo ang praktikal na epekto nito sa pang-araw-araw na gawain. “Ang pagpapahinga dito, ang pag-o-office—kasi dati ang liit-liit ng office, walang privacy. Ngayon, mas matiwasay at merong privacy,” ani Lo. Umaasa rin siya na hihikayatin ng bagong espasyo ang mas maraming youth groups na gamitin ang pasilidad para sa iba’t ibang aktibidad.

Nakikipag-ugnayan ang mga bisita at kawani sa bagong disenyo at naka-aircon na reception area ng sentro, na ayon kay Parish Secretary Christina ay mas maaliwalas at komportable para sa lahat.

Ang sentro ay nagsisilbing personal na handog na sumasalamin sa mga pagpapahalaga ng matriarka ng pamilya, si Felicidad “Nanang” Sy.

“Sa pamamagitan ng kanyang mga gawa, natutunan namin kung ano ang ibig sabihin ng magkaroon ng pananampalataya, maglingkod sa kapwa, at magbigay nang walang hinihintay na kapalit,” ibinahagi ni SM Prime Holdings, Inc. (SMPH) Chairman of the Executive Committee Hans Sy. “Nawa’y maging inspirasyon ito sa ating lahat na magbigay, maglingkod, at isabuhay ang pananampalataya araw-araw.”

Ayon naman kay Teresita Sy-Coson, Vice Chairperson ng SM Investments (SMIC), simple ngunit makabuluhan ang layunin: patatagin ang papel ng Simbahan bilang haligi ng komunidad.

“Umaasa kami na magdudulot ito ng mas maraming ugnayan sa komunidad,” aniya. “Isang lugar kung saan ang mga tao ay hindi lamang dumaraan, kundi tunay na nagtitipon.”

Idinisenyo bilang isang multi-purpose hub, nagbibigay ang sentro ng marangal na tirahan para sa mga pari at mga nakalaang lugar para sa paghubog ng kabataan, mga sakristan, at mga koro.

Isa itong buhay na pagpapahayag ng tahimik na kabutihang-loob ni Nanang—na tinitiyak na magpapatuloy ang kanyang misyon ng paglilingkod para sa mga susunod na henerasyon.

Sa diwa ng tahimik na debosyon ni Nanang, layunin ng foundation na gawing abot-kamay ang pananampalataya sa pang-araw-araw na sandali ng buhay. Hindi lamang ito tungkol sa arkitektura; ito’y tungkol sa pagtiyak na ang bawat tao ay may santuwaryo upang magnilay, manalangin, at makatagpo ng katahimikan.

Sa gitna ng mabilis na takbo ng mga lansangan ng Binondo, ngayon ay matatagpuan ang bagong tayong Felicidad T. Sy Pastoral and Youth Center.