SA halip gamitin ang kaalaman bilang software technician, mas pinili pang magbenta ng ilegal na droga ng 45-anyos na kelot sa Valenzuela City.

Sising alipin si alyas “Boss Mar” residente ng Captain Cruz St. Brgy. Parada nang dakpin ng mga tauhan ni Valenzuela Police Chief P/Col. Nixon Cayaban dakong ala-1:30 ng madaling araw ng Miyerkules sa paanan ng M Delos Reyes Foot Bridge sa E. Francisco St. matapos pagbentahan ng P7,500 halaga ng shabu ang pulis na nagpanggap na buyer.

Ayon kay Col. Cayaban, ilang araw na tiniktikan nina P/Capt. Joan Dorado ang aktibidad ng suspek na mistulang nagbebenta lamang ng ordinaryong produkto sa mismong foot bridge sa Bgy. Parada hanggang tuluyang kumagat sa alok ng police poseur-buyer na nagkunwang bibili ng droga na nagresulta sa kanyang pagkakadakip.

Nang kumpiskahin ng mga pulis ang dalang sling bag ng suspek, nakuha rito ang may 70-gramo pa ng shabu na nagkakahalaga ng P476,000, pati na ang markadong salapi na ginamit sa buy-bust operation.