SINABI ni Acting Senate President Sherwin Gatchalian na nagpapatuloy ang paghahanda para sa impeachment trial ni Vice President Sara Duterte matapos magpalabas ang Senate Impeachment Court ng pre-trial notices na nag-aatas sa prosekusyon at depensa na magsumite ng kanilang mga testigo at ebidensya bago ang June 18 conference.

Ayon kay Gatchalian, nagpapatuloy ang Senate Impeachment Court sa pre-trial stage habang nananatiling may mga tanong sa liderato ng Senado at sa usapin ng quorum sa kapulungan.

“At tuloy-tuloy ang ating preparations for the impeachment,” sabi ni Gatchalian.

Nang tanungin kung naghahanda siyang mamuno sa proceedings, sinabi ni Gatchalian: “Yes, I’m preparing myself as we go along.”

Inatasan ng Senate Impeachment Court ang House prosecution panel at defense team ni Duterte na isumite ang kanilang listahan ng mga testigo at ebidensya sa June 18, kung kailan nakatakdang idaos ang pre-trial conference.

Inatasan din sa notice ang magkabilang panig na talakayin at pagkasunduan ang mahahalagang usapin sa paglilitis, kabilang ang pagmamarka ng ebidensya at pagtatakda ng mga petsa ng trial.

Ang pre-trial conference ay reportedly hindi bubuksan sa media o publiko.

Inaasahang magsisimula ang impeachment trial sa July 6.

Sinabi ni Gatchalian na nailathala na sa mga pahayagan ang bagong impeachment rules.

“I believe na-publish yesterday sa newspapers,” sabi niya.

Inaasahang sa pre-trial process matutukoy ang mga testigong maaaring iharap, mga ebidensyang maaaring isumite at mga procedural matters na maaaring maresolba bago magsimula ang trial proper.

Sinagot din ni Gatchalian ang mga tanong kung maaaring makaapekto sa bilang ng boto na kailangan para sa conviction sa impeachment case ang posisyon ng bagong mayorya sa quorum noong June 3.

Ayon sa kanya, nakabatay ang June 3 proceedings sa Avelino case at sa mga naunang pagkakataon sa Senado kung saan itinuring na sapat ang 12 senador upang makabuo ng quorum.

“Ang aming discussion in the past especially noong June 3 event is the Avelino case, yan ang ating basis,” sabi niya.

Sinabi ni Gatchalian na limitado sa usapin ng quorum ang argumentong ito.

Ngunit nang tanungin kung maaaring ibaba ng parehong posisyon ang bilang ng boto na kailangan para sa conviction, sinabi niya na kailangan pa niyang pag-aralan ang usapin.

“I have to study that. Dahil ang pinag-uusapan naman natin ngayon ay constituting a quorum,” sabi niya.

Sinabi ni Gatchalian na ang patuloy na paglalabas ng suweldo, benepisyo at incentives ay nagpapakitang tuloy ang operasyon ng Senado sa ilalim ng liderato ng bagong mayorya.

“Evidence nga doon ang sweldo ng tao, benefits, and even incentives mauna ng lumabas. So tuloy-tuloy ang operation ng Senado. Sa impeachment tuloy-tuloy rin. We released pre-trial notice yesterday, tuloy-tuloy naman yan, tuloy-tuloy naman ang preparation,” sabi niya.

Dumating ang development habang nananatiling hati ang Senado sa pagitan ng bloc ni Gatchalian at ng grupo ni Senador Alan Peter Cayetano, na patuloy na iginigiit na siya pa rin ang Senate President.

Pinaninindigan ng bloc ni Gatchalian na balidong nailuklok siya sa June 3 proceedings bilang Senate President Pro Tempore at acting Senate President, habang kinukuwestiyon ni Cayetano ang legalidad ng sesyon.

Sa kabila ng leadership dispute, sinabi ni Gatchalian na magpapatuloy ang impeachment process ayon sa calendar ng court.

Inaasahang isusumite ng prosekusyon at depensa ang kanilang listahan ng ebidensya at mga testigo sa June 18 pre-trial conference bago magbukas ang impeachment trial sa July.