UMAASA si Senate President Sherwin Gatchalian na makapaglalabas ng hatol ang impeachment court sa kaso ni Vice President Sara Duterte bago mag-Pasko.

Sa tantya niya, 30 hanggang 45 calendar days pa ang itatagal ng paglilitis.

Nang tanungin kung posibleng may hatol na bago mag-Pasko, sagot ni Gatchalian: “Yan ang gusto nating mangyari.”

Natanong din siya tungkol sa Disyembre 16, ang petsang binanggit ni impeachment court spokesperson Reginald Tongol noong Biyernes. Hindi ito inangkin ni Gatchalian at nanatili siya sa 30 hanggang 45 araw.

Iginiit naman ni Sen. Francis “Kiko” Pangilinan na hindi pa napag-uusapan ng korte ang anumang timetable. Opinyon lamang daw ng tagapagsalita ang Disyembre 16.

May pahinga na humigit-kumulang isa’t kalahati hanggang dalawang linggo sa katapusan ng Oktubre. Hindi rin daw pwedeng magsabay ang paglilitis at ang budget sa plenaryo, na umaabot hanggang madaling-araw.

Malaking tulong daw ang 11 araw na buong-araw na paglilitis, kung saan kaya ang dalawa o tatlong testigo kada araw.

Naiintindihan din daw niya na isasara ang buong kompleks para sa seguridad kapag dumating sina US President Donald Trump at Chinese President Xi Jinping. Kapag nangyari iyon, hindi raw makakapasok ang mga senador.

Limang testigo agad ang tinanggal sa usapin ng confidential funds, at may tinanggal din sa unexplained wealth, ani Gatchalian. Inaasahan din niyang mas bibilis ang takbo pagdating sa depensa.

Pinabulaanan din ng Senate President na si Presiding Officer Francis “Chiz” Escudero lamang ang nagpasya sa testimonya ni dating Sen. Antonio Trillanes IV.

“So ang ibig sabihin hindi lang yan naging decision ng presiding officer,” ani Gatchalian. Dagdag niya, maraming desisyon ng presiding officer ang ikokonsulta muna sa mga senator-judge.

Mahalaga raw ang testimonya ng mga taga-bangko at ng Anti-Money Laundering Council (AMLC) dahil sila ang may hawak ng mga dokumento at kaya nilang patunayan ang mga ito.

Sa social media lamang daw niya napanood ang press conference ni Trillanes.