SINABI noong Lunes ni Leyte Rep. Ferdinand Martin G. Romualdez na malapit nang makaranas ng ginhawa ang mga mamamayan mula sa patuloy na pagtaas ng presyo ng gasolina.

Ginawa ni Romualdez ang pahayag matapos aprubahan ng House of Representatives ang pinagsamang bersyon ng mga panukala na magbibigay kay Pangulong Ferdinand “Bongbong” R. Marcos Jr. ng kapangyarihang pansamantalang suspindihin ang excise tax sa mga produktong petrolyo.

Ang naaprubahang panukalang batas, na pangunahing inakda ni Speaker Faustino “Bojie” G. Dy III at Majority Leader Ferdinand Alexander “Sandro” A. Marcos, ay pinagsamang 15 kaugnay na panukala at dalawang joint resolution, na ang isa ay inakda ni Romualdez.

“Isa na namang malaking pagtaas ng presyo ng gasolina ang nakatakdang ipatupad bukas. Dapat nitong hikayatin kami, mga miyembro ng House at Senado, na pabilisin ang pinal na pag-apruba sa panukalang ito na sertipikadong urgent ni PBBM,” sabi ng lider ng House mula Leyte.

Sinabi niya na kapag nalagdaan na ng Pangulo ang panukalang batas bilang isang ganap na batas, maaari na niyang ideklara ang state of national emergency at suspindihin ang excise tax sa gasolina.

“Magbibigay ito ng kinakailangang ginhawa sa mga motorista at mamimili sa pamamagitan ng pagbaba ng presyo ng gasolina ng P6 hanggang P10,” aniya.

“Maaaring maliit ang halagang ito, lalo na’t muli na namang tataas ang presyo sa mga gasolinahan, ngunit nagbibigay din ang gobyerno ng iba pang uri ng tulong,” dagdag ni Romualdez.