Calendar
Si Dr. Jose Antonio Goitia ay Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at ng Filipinos Do Not Yield Movement (FDNY). Siya ay may hawak na Juris Doctor at Doctor of Philosophy (PhD), gayundin ang mga advanced degree na MNSA, MPA, at MBA, bukod pa sa iba.((NI JON-JON C. REYES))
Goitia: Nasa atin ang batas, nasa atin ang katotohanan ukol sa WPS
SA Scarborough Shoal, muling napigilan ang pagpasok ng mga mangingisdang Pilipino sa pamamagitan ng floating barrier, kahit ang lugar ay nasa loob ng exclusive economic zone ng Pilipinas ayon sa international law.
Kasabay nito, patuloy ang pagpapalawak ng presensya ng dayuhan sa ibang bahagi ng karagatan, kabilang ang mga ulat ng pagpapatayo ng airbase sa Antelope Reef.
Ayon sa Foundation for Defense of Democracies, ito ay bahagi ng tinatawag na “gray-zone” strategy—mga hakbang na hindi direktang komprontasyon, ngunit may layuning unti-unting baguhin ang umiiral na sitwasyon sa dagat.
“Maaaring magtayo ng harang sa dagat at mga runway sa mga bahura, pero hindi kailanman maitatayo ang soberanya mula sa isang iligal na batayan.”
Ito ang binigyang-diin ni Chairman Emeritus Dr. Jose Antonio Goitia.
Ang 2016 Arbitral Award sa ilalim ng UNCLOS ay nagpasya na walang sapat na batayan ang malawak na “historic rights” na inaangkin ng Tsina sa loob ng tinatawag na nine-dash line. Ang desisyong ito ay pinal at may bisa sa ilalim ng Convention.
“Ang kontrol na bunga ng pamimilit ay hindi soberanya. Isa itong okupasyon na pilit ginagawang normal sa mata ng mundo.”
Para sa mga Pilipino, hindi lang ito tungkol sa mapa o hangganan.Ang West Philippine Sea ay pinagkukunan ng kabuhayan ng maraming mangingisda at komunidad. Kapag hinaharangan ang pagpasok dito, agad itong nararamdaman sa kanilang pang-araw-araw na pamumuhay.
“Kapag ang pag-access ay kailangang ipagpaalam sa iba, hindi lang teritoryo ang nalalagay sa panganib, kundi ang dangal ng bansa.”
Matibay ang paninindigan ng Pilipinas. Ipinaglalaban ang ating mga karapatan batay sa batas, itinatala ang bawat insidente, at patuloy na isinusulong ang mapayapang resolusyon nang hindi sumusuko sa anumang panggigipit.
“Naninindigan tayo. Dahil nasa atin ang batas at nasa atin ang katotohanan.”
Ani Goitia umaasa umano ang Tsina na sa paglipas ng panahon, ang paulit-ulit na hakbang ay tuluyang tatanggapin bilang normal.
“Walang harang ang makakahadlang sa katotohanan. Walang base ang makakapagtibay ng maling pag-angkin. At walang kapangyarihan ang makakaagaw sa isang bayang handang ipaglaban ang sa kanya,” dagdag niya.
