NOONG Abril 6, isang eroplano ng Philippine Coast Guard na nagsasagawa ng karaniwang patrol malapit sa Panganiban (Mischief) Reef at Zamora (Subi) Reef ang hinarap ang pagpapaputok ng flares sa paligid nito ng mga pwersang Tsino.

Ilang araw matapos nito, pinasinayaan ng Pilipinas ang bagong Coast Guard base sa Pag-asa Island.

“Tahimik ngunit mahalagang hakbang ito para palakasin ang ating presensya at kakayahang pangalagaan ang ating teritoryo. Walang agresyon. Walang provokasyon. Isang bansang ginagawa lamang ang nararapat,” ayon kay Chairman Emeritus Dr. Jose Antonio Goitia.

Dagdag ni Goitia na tuwing maayos at legal na kumikilos ang Pilipinas, may kapalit itong panggigipit. “Naranasan na natin ito—water cannon, laser incidents, mapanganib na maniobra sa dagat. Ngayon, pati sa himpapawid ay dinadala na ang ganitong uri ng kilos,” aniya.

“Ito ay malinaw na pananakot. Walang bansa na kumikilos nang ayon sa batas ang dapat ilagay sa panganib ang buhay ng kanyang mga tauhan,” dagdag pa niya.

Ngunit ang Pilipinas ay hindi basta sumusuko, idiniin ni Goitia.

“Kapag ang diyalogo ay napapalitan ng panggigipit, hindi na ito simpleng hindi pagkakaunawaan. Ito ay pagtatangkang magdikta, at dapat itong tutulan. Maliwanag ang ating paninindigan.

Hindi tayo ang nagpapalala ng tensyon. Hindi tayo naghahanap ng gulo. Nananatili lamang tayo kung saan tayo may karapatan,” sabi pa ni Goitia.

Narito pa ang mensahe ni Goitia:

“Ang soberanya ay hindi ipinagtatanggol sa salita lamang. Ipinapakita ito sa presensya, sa tapang, at sa paninindigan. Sa huli, higit pa ito sa isang insidente.Ito ay tungkol sa kung papayag ba tayong takutin sa sarili nating karagatan. Kung hahayaan ba nating mabago ang katotohanan dahil sa presyur.

Ang mensahe ng Pilipinas ay dapat manatiling malinaw:

Magpapatuloy tayo sa pagpapatrolya sa ating karagatan.

Ipaglalaban natin ang ating mga karapatan.

At hindi tayo magpapasindak sa sarili nating teritoryo. Ang West Philippine Sea ay atin. At pananatilihin natin ito.”