PINAGTIBAY ng iba’t ibang partido sa Kamara de Representantes ang pakikipag-alyansa nito sa Lakas-Christian Muslim Democrats (Lakas-CMD) na pinamumunuan ni Speaker Ferdinand Martin G. Romualdez.

Pumirma sa alliance agreement ang Partido Demokratiko Pilipino-Lakas ng Bayan (PDP-Laban), National Unity Party (NUP), Nacionalista Party (NP), Nationalist People’s Coalition (NPC), Party-list Coalition Foundation Inc. (PCFI), Partido Navoteño, at Centrist Democratic Party of the Philippines (CDC) upang ipakita ang pakikipagkasundo nito sa Lakas-CMD.

“In view of the shared vision of LAKAS-CMD and [PDP-Laban, NUP, NP, NPC, Partido Navoteño, and CDC], the parties have agreed to reiterate their alliance in the House of Representatives,” ayon sa alliance agreement.

Sinaksihan nina Speaker Romualdez, presidente ng Lakas-CMD; Senior Deputy Speaker Aurelio “Dong” Gonzales ng PDP-Laban, Agusan del Norte 1st District Rep. Jose “Joboy” S. Aquino II, Secretary General ng Lakas-CMD; House Secretary General Reginald “Reggie” Velasco, at iba pang opisyal ng Kamara ang pirmahan ng kasunduan.

Pumirma sa magkakahiwalay na kasunduan sina House Majority Leader Manuel Jose “Mannix” M. Dalipe, Lakas-CMD executive Vice President; Palawan Rep. Jose Alvarez, PDP-Laban President; Deputy Speaker and Antipolo City 1st District Rep. Roberto Puno, NUP Vice Chairman for Internal Affairs; Romblon Lone District Rep. Eleandro Jesus F. “Budoy” Madrona, stalwart ng NP; Rizal 1st District Rep. Michael John R. Duavit, NPC President; Ako Bicol Party-list Rep. Zaldy Co, PCFI President; Navotas Lone District Rep. Tobias “Toby” Tiangco, Partido Navoteño Chairman; at Cagayan de Oro City 2nd District Rep. Rufus Rodriguez, CDC President.

Ang kasunduan ay epektibo hanggang sa pagtatapos ng 19th Congress sa 2025.

Nakasaad sa kasunduan ang kanilang pagsuporta kay Pangulong Ferdinand R. Marcos Jr. at sa kanyang legislative agenda na ang layunin ay mapaganda ang kalagayan ng bansa.

“Both parties agree to give their full and unqualified support to the Speaker of the House of Representatives, 19th Congress, Ferdinand Martin G. Romualdez,” sabi pa sa kasunduan.

Pinuri naman ni Speaker Romualdez ang bagong kasunduan na isa umanong malinaw na pagpapakita ng suporta sa administrasyon na ang mithiin ay makalikha ng maraming trabaho, at magpatuloy ang paglago ng ekonomiya ng bansa.

“It also emphasizes the importance of unity and cooperation among all political parties. This is a critical message at a time when the country is facing a number of challenges,” sabi pa ni Speaker Romualdez. “We have a lot of work ahead of us. By working together, we can help address these challenges and build a better future for our fellow Filipinos.”