𝗕𝗜𝗟𝗔𝗡𝗚 𝗮𝗱𝘃𝗼𝗰𝗮𝘁𝗲 𝗻𝗴 𝗶𝗹𝗹𝗲𝗴𝗮𝗹 𝗻𝗮 𝘀𝘂𝗴𝗮𝗹 𝘀𝗮 𝗯𝗮𝗻𝘀𝗮, k𝗶𝗻𝗮𝗸𝗮𝘁𝗶𝗴𝗮𝗻 𝗻𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝗮𝗻𝗴 𝘁𝗮𝘁𝗮𝗵𝗮𝗸𝗶𝗻𝗴 𝗺𝗶𝘀𝘆𝗼𝗻 𝗻𝗴 𝗯𝗶𝗻𝘂𝗼𝗻𝗴 “𝗾𝘂𝗮𝗱 𝗰𝗼𝗺𝗺𝗶𝘁𝘁𝗲𝗲” 𝘀𝗮 𝗞𝗮𝗺𝗮𝗿𝗮 𝗱𝗲 𝗥𝗲𝗽𝗿𝗲𝘀𝗲𝗻𝘁𝗮𝗻𝘁𝗲𝘀 𝘂𝗽𝗮𝗻𝗴 𝗺𝗮𝗽𝗮𝗻𝗮𝗴𝗼𝘁 𝗮𝗻𝗴 𝗺𝗴𝗮 𝘁𝗮𝗼𝗻𝗴 𝗻𝗮𝘀𝗮 𝗹𝗶𝗸𝗼𝗱 𝗻𝗴 𝘀𝗶𝗻𝗱𝗶𝗸𝗮𝘁𝗼 𝗻𝗮 𝗸𝗼𝗻𝗲𝗸𝘁𝗮𝗱𝗼 𝘀𝗮 𝗹𝗮𝗴𝗮𝗻𝗮𝗽 𝗻𝗮 𝗼𝗽𝗲𝗿𝗮𝘀𝘆𝗼𝗻 𝗻𝗴 𝗣𝗵𝗶𝗹𝗶𝗽𝗽𝗶𝗻𝗲 𝗢𝗳𝗳𝘀𝗵𝗼𝗿𝗲 𝗚𝗮𝗺𝗶𝗻𝗴 𝗢𝗽𝗲𝗿𝗮𝘁𝗼𝗿𝘀 (𝗣𝗢𝗚𝗢).

Ayon kay Valeriano, chairman ng House Committee on Metro Manila Development, masyado umanong napakalawak at makapangyarihan ang POGO operation sa bansa. Kaya inaasahan na magiging malalim at nakabuluhan ang gagawing imbestigasyon ng quad committee hinggil dito na nakatakda sa susunod na linggo (Agosto 15).

Paliwanag pa ni Valeriano na sa pag-usad ng ikakasang pagsisiyasat ng quad committee, inaasahan na may mga hindi kanais-nais na mahahalukay katulad ng posibleng pagkakasangkot ng mga matataas na opisyal ng pamahalaan sa POGO sa pamamagitan ng pagsisilbing “padrino” nito o ang pagbibigay nila ng proteksiyon sa mga Chinese nationals na nagpasimula at nagpalaganap ng POGO sa iba’t-ibang lugar dito sa Pilipinas.

Pagdidiin ni Valeriano, hindi aniya lingid sa ating kaalaman na sa pamamagitan ng “drug money” ng mga Chinese nationals ay may mga tiwaling opisyal ng gobyerno ang nasuhulan o naambunan ng malaking halaga ng pera upang makakuha ng mga pekeng dokumento ang mga nasabing Intsik na nagpapanggap na mga Pilipino.

Sabi pa ng kongresista, masyadong malalim at masalimuot ang kasong iimbestigahan ng Kamara de Representantes dahil may mga Chinese nationals ang nakabili na ng mga ari-arian o lupain at nakapagpatayo na ng mga lehitimong negosyo dito sa Pilipinas gaya ng POGO para lamang pagtakpan ang kanilang illegal activities.

“Sa gagawing imbestigasyon ng Kamara tungkol sa isyung ito. Asahan natin na may mga mabubungkal at may mabahong amoy ang kanilang mahahalukay gaya sa isang tambak ng basura.

Sapagkat masyadong malawak at malalim ang operasyon ng POGO dito sa Pilipinas,” paliwanag ni Valeriano.

Ayon naman sa chairman ng House Committee on Dangerous Drugs na si Surigao del Norte 2nd Dist. Cong. Robert Ace S. Barbers, makasaysayan ang binuong Komite sapagkat ngayon lamang nagkaroon ng apat na Komiteng pinagsama-sama sa pagsasagawa ng imbestigasyon.