PORMAL nang itinakda ng impeachment court ng Senado ang pre-trial conference sa kasong impeachment laban kay Bise Presidente Sara Zimmerman Duterte, na siyang susunod na mahalagang hakbang sa proseso at maghahanda sa paglalatag ng mga ebidensiya at testigo ng magkabilang panig, ayon kay House prosecutor at kinatawan ng Bicol Saro Party-list na si Terry L. Ridon nitong Martes.

Ayon kay Ridon, sa Notice of Pre-Trial Conference na inilabas noong Hunyo 9 at nilagdaan ni Acting Senate President at Presiding Officer na si Win Gatchalian, inatasan ng impeachment court si Bise Presidente Duterte at ang mga pampublikong tagausig ng Kamara na dumalo sa Hunyo 18, 2026, alas-9 ng umaga sa Sen. C.M. Recto Room sa Senado.

Sinabi ni Ridon na nakasaad sa abiso na maaaring personal na dumalo ang mga partido o sa pamamagitan ng kanilang abogado. Inaasahan ding tatalakayin ang mahahalagang usapin bago ang paglilitis, kabilang ang pag-uusap sa mga napagkasunduang katotohanan, pagpapasimple ng mga isyu, pagmamarka ng mga dokumentaryo at pisikal na ebidensiya, pagkilala sa mga testigo, pagtatakda ng mga petsa ng paglilitis, at ang pagkakasunod-sunod ng presentasyon ng mga ebidensiya, gayundin ang iba pang mga hakbang upang matiyak ang patas at mabilis na pagdinig ng kaso.

Inatasan din umano ng impeachment court ang magkabilang panig na isumite ang kani-kanilang pre-trial briefs hindi lalampas sa Hunyo 15.

Ayon sa abiso, dapat maglaman ang pre-trial brief ng “buod ng mga tinatanggap na katotohanan, mga iminungkahing kasunduan, at mga isyung kailangang resolbahin,” gayundin ng listahan ng mga dokumento, ebidensiya, at mga testigong kasalukuyang kilala at makatwirang maaaring iharap ng bawat panig.

Sinabi rin ni Ridon na ang mga partidong nais magreserba ng karagdagang ebidensiya o mga testigo ay kailangang ihayag ang pagkakakilanlan ng mga ito o ilarawan ang dokumentaryo o pisikal na ebidensiya at tukuyin ang layunin ng kanilang presentasyon hindi bababa sa tatlong araw bago sila iharap sa impeachment court.

Para sa seguridad at kaligtasan, sinabi ni Ridon na pinahihintulutan ng impeachment court ang mga partido na pansamantalang hindi ibunyag ang pagkakakilanlan at detalye ng ilang testigo hanggang sa mismong araw ng kanilang pagharap, basta’t kasama sila sa kabuuang bilang ng mga testigong isiniwalat at nakapaloob sa itinakdang mga petsa ng paglilitis.

Upang mahikayat ang bukas at tapat na talakayan at maisulong ang layunin ng pre-trial, sinabi niyang hindi papayagang masaksihan ng media o publiko ang naturang pagdinig.

“Ang mga pagdinig sa Pre-Trial Conference ay hindi magiging bukas sa media o sa publiko,” ayon sa nakasaad sa abiso.

Nagbabala rin ang impeachment court na ang hindi pagsusumite ng pre-trial brief sa itinakdang oras o hindi pagdalo sa pre-trial conference nang walang balido at legal na dahilan ay maaaring magresulta sa pagkawala ng karapatang magharap ng partikular na mga ebidensiya o mga testigo.

Idinagdag ni Ridon na maaari ring ituloy ng impeachment court ang pagbuo ng pre-trial order batay lamang sa mga rekord na nasa kanilang kamay kung mabigong sumunod ang alinmang panig sa mga itinakdang rekisito.

Ayon pa kay Ridon, inaasahang magsisilbing pundasyon ang pagpupulong sa Hunyo 18 para sa impeachment trial sa pamamagitan ng pagtukoy sa mga puntong pinagkakasunduan at pinagtatalunan, pag-oorganisa ng mga ebidensiya, at pagtatakda ng iskedyul ng mga susunod na pagdinig.