MULING hinikayat ni Senador Alan Peter Cayetano ang Department of Information and Communications Technology (DICT) na magtatag ng Anti-Scam Center sa bansa upang tugunan ang lumalalang problema ng mga scam.

Inihain ito ni Cayetano sa deliberasyon ng Senado para sa panukalang budget ng DICT para sa 2025 nitong November 20, 2024.

Binigyang diin ng senador ang pangangailangan ng agarang aksyon upang maitatag ang nasabing ahensiya.

“Go to Singapore and Hong Kong because they have anti-scam centers in one office, nandoon na y’ung pulis, y’ung mga IT personnel, at y’ung mga bangko,” wika ni Cayetano.

Ipinaliwanag niya na ang aktibong hakbang ng mga bansang ito sa pagtugon sa iba’t ibang uri ng scam ay nagpapakita ng pangangailangan para sa Pilipinas na magkaroon ng katulad na sistema sa gitna ng mas sopistikadong mga scam.

“Parang sanay pa rin tayo sa pa-isa-isang scam. Pero lahat ng scam na nabanggit dito at sa ibang Senate hearings, nandoon na [sa kanila],” wika niya.

Binanggit din ni Cayetano na ang pagkakaroon ng mahusay na anti-scam system ay hindi lamang makababawas sa bilang ng mga scam kundi makatutulong din sa pagbawi ng malalaking halaga ng pera, gaya ng napatunayan sa tagumpay ng Singapore.

“In the last two years, ang na-recover ng mga Singaporean government for those na na-scam is more than 600 million Singaporean dollars,” wika niya.

Ang Anti-Scam Command (ASCom) ng Singapore, na naging operasyonal noong March 2022, ay sentralisado sa pag-iimbestiga ng mga scam, pagtugon sa mga insidente, at pagpapatupad ng batas. Lahat ng mga tungkuling ito ay pinamamahalaan ng iisang ahensya.

Nanawagan si Cayetano kay DICT Secretary Ivan John Uy na simulan ang mga hakbang para maitatag ang isang anti-scam center.

“May I bring that up to you na sana next budget, next year, mayroon na tayong sariling anti-scam center na baka pwede ninyong pangunahan,” wika niya.