SA botong 176 na pabor at walang tutol, inaprubahan ng Kamara de Representantes sa ikatlo at pinal na pagbasa ang House Bill (HB) 11395 na naglalayong gawing permanente ang Assistance to Individuals in Crisis Situations (AICS) program ng Department of Social Welfare and Development (DSWD).

Ayon kay Speaker Ferdinand Martin G. Romualdez, napatunayan sa karanasan na ang AICS ay isang epektibong mekanismo ng pamahalaan laban sa kahirapan at upang makapagbigay ng pinansyal na suporta sa mga mahihirap, walang trabaho, dumaranas ng kagipitan at mga nasa bulnerableng kalagayan.

Binanggit niya na ang HB 11395 ay konsolidasyon ng 11 magkakahiwalay na panukala, na nagpapakita ng pagkilala ng mga may-akda sa kahalagahan ng AICS at sa pangangailangang maisabatas ito.

“This program of the DSWD has helped countless Filipinos with the type of aid that they cannot obtain from other government agencies and local government units, such as burial, transportation, food, and material assistance,” saad ng lider ng Kamara na mayroong 306 kinatawan.

Mas malawak ang saklaw ng AICS kumpara sa ibang ayuda na ibinibigay ng mga ahensya ng gobyerno.

“Thus the need to institutionalize it in a law for its existing and potential beneficiaries so they could be assured of continued help under any national or DSWD leadership,” dagdag pa niya.

Kabilang sa mga may-akda ng panukalang batas sina Stella Luz Quimbo, Rosemarie Panotes, Yedda Marie K. Romualdez, Jude Acidre, Paul Daza, Keith Micah Tan, Eric Yap, Edvic Yap, Jocelyn Tulfo, Ralph Wendel Tulfo, Jeffry Soriano, Ernesto Dionisio, Rosanna Vergara, Florida Robes, Wowo Fortes, Ruth Mariano-Hernandez, Dale Corvera, Josephine Lacson-Noel, Lani Mercado-Revilla, Reynolds Michael Tan, Lordan Suan, Patrick Michael Vargas, Jason Almonte, Dante Garcia, Samuel Verzosa Jr., Ching Bernos, Linabelle Ruth Villarica, Augustina Dominique Pancho, Geraldine Roman, JC Abalos, Reynante Arrogancia, Eduardo Rama Jr., Romeo Acop, Arlene Brosas;

Loreto Acharon, Roy Loyola, Danny Domingo, Maria Fe Abunda, Dean Asistio, Josefina Tallado, Yevgeny Emano, Carmelo Lazatin, Mary Mitzi Cajayon-Uy, Gerville Luistro, Antonieta Eudela, Bai Dimple Mastura, Luz Mercado, Francisco Jose Matugas II, Alfredo Marañon III, Emmarie Ouano-Dizon, Harris Christopher Ongchuan, Maria Rachel Arenas, Nelson Dayanghirang, Noel Rivera;

Bryan Revilla, Christopherson Yap, Ramon Jolo Revilla, Arthur Celeste, Marcelino Libanan, Richard Gomez, Eleanor Bulut-Begtang, Wilfrido Enverga, Mark Go, Joseph Tan, Bienvenido Abante, Jose Manuel Alba, Gutierrez, Ramon Rodrigo Rodriguez, Bonifacio Bosita, Jaime Fresnedi, Peter John Calderon, Arnan Panaligan, Salvador Pleyto, Ricardo Cruz, Angelica Natasha Co, Juliet Marie Ferrer, Anna York Bondoc, Loreto Amante, Gus Tambunting, Ralph Recto, Edwin Olivarez, Jaime Eduardo Cojuangco, Joseph Gilbert Violago, Edward Hagedorn, Marlyn Primicias-Agabas at Claude Bautista.

Ayon sa panukala, ang mga target na benepisyaryo ng AICS ay “individuals or families who are indigent, financially incapacitated, stateless persons, repatriates, deportees, transients, vulnerable, disadvantaged, or internally displaced persons or in crisis situations based on the assessment of the social workers of the DSWD.”

Ang bawat kwalipikadong benepisyaryo “shall receive financial, medical, transportation, food, material assistance, and other assistance, to include disability support services including other professional assistance available in the DSWD, such as psychosocial support or intervention for dysfunctional families and their children who need trauma care and management, and legal consultation,” batay sa pagsusuri ng mga social worker ng DSWD.

Kailangan ng kaukulang dokumentasyon, ayon sa gabay ng DSWD para sa AICS, para sa lahat ng uri ng ayuda na may kaugnayan sa paggasta ng pondo.

Ang pagbibigay ng tulong at serbisyo ay isasagawa ng central office ng DSWD, ng field offices, mga offsite venue at extension offices.

Sa ilalim ng panukala, inaatasan ang DSWD na magtatag ng isang Integrated Program Delivery System upang matiyak ang mabilis na akses sa AICS, sa pamamagitan ng mekanismo ng real-time data sharing sa pagitan ng DSWD at mga local government unit (LGU) para matukoy ang mga kailangang ayuda ng mga kwalipikadong benepisyaryo at maiwasan ang pang-aabuso.

Inaatasan din ang DSWD na magsagawa ng monitoring at evaluation upang masukat ang bisa ng programa at mag-post ng regular na update sa kanilang website, kabilang ang impormasyon tungkol sa disbursement ng pondo at mga benepisyaryo.

May karagdagang mga pananggalang ang panukala upang matiyak ang maayos na implementasyon:

(a) Ipinagbabawal sa mga opisyal o kawani ng LGUs, kanilang mga ahente, kinatawan, o kamag-anak hanggang sa ikaapat na antas ng konsanguinidad o affinidad, ang makialam sa implementasyon o pamamahagi ng serbisyo o pondo ng AICS sa mga kwalipikadong benepisyaryo;

(b) Ipinagbabawal din sa sinumang indibidwal o organisasyon ang mga sumusunod na gawain:

Defraud the government by issuing or presenting falsified or misleading documents, or using false pretenses or other fraudulent acts to acquire the assistance provided under this Act;

Coerce, invite, encourage, or assist persons to seek assistance from the DSWD for purposes of acquiring from the beneficiary a portion of the assistance, before or after the receipt of assistance;

Mislead an individual or group to join, pay, or cooperate with a group falsely representing connection or affiliation with DSWD or falsely promising priority in the processing of assistance.

Ang sinumang lalabag ay maaaring patawan ng anim na buwang pagkakabilanggo at administratibong pananagutan kung siya ay isang kawani ng gobyerno; at isang taong suspensyon sa pag-avail ng ayuda para sa unang paglabag at pagkakabilanggo ng isa hanggang anim na taon para sa ikalawang paglabag kung siya ay benepisyaryo.

Bumubuo rin ang panukala ng isang joint congressional committee upang bantayan ang implementasyon ng panukalang batas.

Inaatasan ng panukala ang DSWD na maglabas ng implementing rules and regulations. Ang pondong gagamitin sa pagpapatupad ng AICS ay isasama sa taunang badyet ng DSWD.