DINAKMA ng pulisya ang 23-anyos na kelot na walang habas na nagpaputok ng baril na ikinasindak ng kanyang mga kapitbahay Martes ng hapon sa Taguig City.

Kaagad rumesponde ang pulisya nang matanggap ang tawag ng barangay sa pagpapaputok ng baril ng suspek na si alyas Ryan dakong alas-5:40 ng hapon sa Brgy. New Lower Bicutan.

Sa tinanggap na ulat ni Southern Police District (SPD) District Director Manuel Abrugena, mabilis na tumakas ang suspek nang matunugan ang pagdating ng mga pulis subalit kaagad din siyang nadakip sa follow-up operation.

Ayon kay BGen. Abrugena, nakuha ng mga umarestong pulis sa suspek isang hindi lisensiyadong at walang serial number na kalibre.45 paltik na pistola na may apat na bala na isinumite na sa SPD Forensic Unit.

Nakakuha rin ang pulisya ng isang basyo ng bala ng kalibre .45 sa lugar na isasailalim din sa ballistic examination upang alamin kung nagmula ito sa baril na pinaputok ng suspek.

Kakasuhan ng paglabag sa Comprehensive Firearms and Ammunition Regulation Act (RA 10591), paglabag sa Omnibus Election Code (RA 7166), at alarm and scandal ang suspek sa Taguig City Prosecutor’s Office.