IPINAHAYAG ni Senadora Grace Poe ang kanyang suporta sa ulat na plano ng Department of Transportation (DOTr) na payagang makabiyahe ang mga hindi pa konsolidadong jeepney.

Sa kanyang pahayag noong Abril 8, sinabi ni Poe na ang desisyong ito ay “isang hakbang tungo sa tamang direksyon.”

Binigyang-diin ng senadora na ang pagsasaayos ng Public Utility Vehicle Modernization Program (PUVMP) ay nararapat magsimula sa pagkilala sa karapatan ng mga tsuper sa isang maayos na kabuhayan.

“Ang pagsasaayos ng ating magulong programa para sa modernisasyon ay kailangang magsimula sa pagkilala sa karapatan ng ating mga tsuper na magkaroon ng disenteng kabuhayan at maging bahagi sa makabuluhang mga oportunidad para umunlad,” aniya.

Iginiit din ni Poe na dapat gawing mas accessible ang proseso ng pagkuha o pag-renew ng prangkisa para sa mga driver at operator. “Umaasa tayong hindi pahihirapan ng DOTr at ng mga kaugnay na ahensya nito ang ating jeepney drivers at operators na muling makakuha ng kanilang prangkisa,” wika niya.

Kasabay nito, tinukoy ng senadora ang pangangailangan ng malinaw at handang ruta upang matiyak ang patuloy na serbisyo sa mga komyuter. “Kasabay nito, dapat handa ang mga planong ruta para tiyaking may sapat na transportasyon ang ating mga komyuter sa lahat ng daanan,” dagdag pa niya.

Batay sa mga ulat, sinabi ni DOTr Secretary Vince Dizon na kahit ang mga operator na hindi sumali sa mga kooperatiba o korporasyong itinatag sa ilalim ng PUVMP ay papayagang magsumite ng aplikasyon para sa franchise renewal. Ang pagbabagong ito ay inaasahang makatutulong sa mga hindi nakasunod sa consolidation requirement ng programa.

Ang PUVMP, na inilunsad noong 2017, ay layong palitan ang mga lumang jeepney ng mga mas moderno at environment-friendly na sasakyan na sumusunod sa Euro 4 standards. Gayunpaman, binanggit ng ilang sektor na ang presyo ng mga bagong unit—na higit sa ₱2 milyon bawat isa—ay hadlang para sa maraming indibidwal na operator.

Samantala, nilinaw ng Land Transportation Franchising and Regulatory Board (LTFRB) na wala pang inilalabas na opisyal na kautusan ukol sa muling pagbibigay-prangkisa sa mga hindi konsolidadong yunit.

“The matter is still under review and pending further instruction,” ayon kay LTFRB Spokesperson Atty. Ariel Inton,

Sa pagtatapos ng kanyang pahayag, iginiit ni Poe ang pangarap para sa isang sistemang pampublikong transportasyon na makatao at world-class. “Gusto nating lahat ng sistema ng transportasyon na may dangal, ligtas, at naaayon sa pamantayang internasyunal,” aniya.

Sa ngayon, hinihintay pa ng mga stakeholder ang pormal na anunsyo mula sa DOTr at LTFRB hinggil sa opisyal na estado ng mga unconsolidated jeepney.