NATAGPUANG patay ang mag-live in partner sa kanilang bahay sa Pasig Line St., Sta. Ana, Manila noong Sabado.

Ayon sa report ng Manila Police District (MPD), nadiskubreng nakahandusay at patay na ang biktimang si Elenita, 56, habang si Rodrigo, 68, ay natagpuang patay sa banyo.

Nakatakas ang mga suspek sa krimen na nakilala na sina alyas Vanjo, 32, at isang hindi pa nakikilalang salarin na tinatayang nasa edad 25-30 anyos ang edad, mga 5’5 ang taas, naka asul na hoodie jacket at puting cap

Base sa report ng MPD, bandang alas-6:40 ng umaga ng madiskubre ang bangkay ng dalawa. Nabatid sa mga testigo na tinatawag ang mga biktima at ilang katok na sa pinto pero walang sumasagot.

Nang pwersahang binuksan, doon na nadiskubre ang bangkay ng dalawa. Sa pagsisiyasat, nadiskubre din ang duguang martilyo at patalim na posibleng ginamit sa krimen.

Malaki ang hinala ng pulisya na posibleng pagnanakaw ang motibo sa pagpatay sa mga biktima.