TIMBOG sa buy-bust ng mga pulis ang 23-anyos na binansagang “boss” ng mga suspek na tulak noong Sabado sa Caloocan City.

Umabot sa 155 gramo ng shabu ang nakumpiska ng mga tauhan ni Caloocan police chief P/Col. Edcille Canals kay alyas Boss na may katumbas na halagang P1.054 milyon.

Ayon kay Col. Canals, isinagawa ang buy-bust dakong alas-12:53 ng hatinggabi sa Block 14, Kaagapay Road, Brgy. 188, habang naka-antabay sa paligid ang mga tauhan ng Station Drug Enforcement Unit (SDEU) at Police Sub Station 11.

Nahuli ang suspek matapos tanggapin ang bayad ng poseur-buyer na pulis, ayon sa report.

Pinuri ni Northern Police District (NPD) Acting District Director P/Col. Josefino Ligan ang Caloocan police sa pagkakatiklo sa suspek.