HALLUCINATION!

Buwelta ito ni Executive Secretary Lucas Bersamin sa akusasyon ni dating Pangulong Rodrigo Duterte na pinopondohan ng Malakanyang ang mga banat ni dating Senador Antonio Trillanes.

Tanong ni Bersamin, ano raw ang mga pinagsasabi ng dating Pangulo.

Sinabi pa ni Bersamin na mahirap nang pumatol sa mga paratang ng dating Pangulo dahil malinaw na hallucination na lamang ito.

Una rito, nagsasagawa ng TikTok video ang dating chief presidential legal counsel ni Duterte na si Salvador Panelo nang bigla itong makatanggap ng tawag mula sa dating Pangulo.

Ayon kay Duterte, hindi naman gagalaw si Trillanes kung walang basbas ng Malakanyang dahil kaibigan nito si Pangulong Ferdinand “Bongbong” M arcos Jr.

Nagkaharap sina Duterte at Trillanes sa huling hearing ng Quad committee ng Kamara kaugnay sa anti-drug war campaign ng dating administrasyon.

Inaakusahan ni Trillanes si Duterte na tumanggap ng drug money bagay na ikinagalit ng dating Pangulo at muntik hampasin ng mikropono ang dating Senador.