INIHAYAG ni Quezon City Police District (QCPD) Director P/Brig. Gen. Redrico Maranan na aabot sa 193 motorcycle mufflers at 15 mga blinker ng mga sasakyan ang nakumpiska sa lungsod.

Ang mga ito nakumpiska ng District Traffic Management Unit (DTMU) sa pamumuno ni P/Lt. Col. Von Alejandrino mula Setyembre 9 hanggang 15, bilang bahagi ng pinaigting na kampanya laban sa mga iligal na modifications at gadgets sa sasakyan.

Pinaghuhuli din ng DTMU ang 1,083 motorcycle riders na may iba’t-ibang violations at nabigyan ng traffic violation ticket.

Aabot sa 1,029 na motorsiklo ang pinalaya matapos na sumunod sa mga kinakailangang regulasyon, habang 54 ang na-impound dahil sa iba’t ibang paglabag.

Tiniyak ng QCPD ang pagtataguyod ng mas malinis at luntiang kapaligiran sa lungsod kung saan 504 environmental ticket na ang inisyu sa mga indibidwal para sa mga paglabag tulad ng hindi wastong pagtatapon ng basura at hindi pagsunod sa mga lokal na regulasyon sa kapaligiran.