NASAMPAHAN na ng kasong robbery with homicide ang dalawang suspek, kabilang ang menor-de-edad na binatilyo,na nadakip ng pulisya matapos masangkot sa panghoholdap at pagpatay sa 26-anyos na motorcycle taxi rider kamakailan sa Taguig City.

Bagama’t walang pananagutang kriminal sa ilalim ng batas ang mga menor-de-edad, sinampahan pa rin ng kaso ng Taguig police ang 17-anyos na binatilyo, pati na ang kasabuwat niyang nasa hustong edad, at ipinaubaya na sa hukuman na magdetermina kung umakto na may “discernment” o may kapasidad na maunawaan ng binatilyo ang tama at mali sa kanyang ginawa.

Batay sa natanggap na ulat ni Southern Police District (SPD) Director P/BGen. Randy Arceo, ang binatilyo ang nag-book at nagpahatid sa biktimang si alyas “Jayson” sa Barangay Calzada Tipas, Taguig City noong madaling araw ng Marso 11, 2026.

Pagsapit sa lugar dakong alas-3:43 ng madaling araw, naghihintay na ang kasabuwat ng binatilyo na siyang nangholdap at sumaksak sa biktima.

Nag-viral pa ang video na kuha ng CCTV sa lugar ang paika-ikang paglalakad at humihingi ng tulong ng biktima habang hawak ang dibdib at may bitbit na helmet.

Napagalaman sa live-in partner ni alyas Jayson na kahit madaling araw ay nagta-trabaho ang kinakasama upang makaipon dahil sa plano nilang pagpapakasal ngayong taon.