NANAWAGAN si Deputy Minority Leader Senator Risa Hontiveros na magbigay ang Manila Electric Company (MERALCO) ng mas malaking refund sa mga konsyumer, dahil ang kasalukuyang P40 bilyon ay itinuturing niyang hindi sapat.
Sa deliberasyon ng House Bill No. 10926, na naglalayong palawigin ang prangkisa ng MERALCO ng karagdagang 25 taon, kinuwestiyon ni Hontiveros ang mataas na weighted average cost of capital (WACC) ng kumpanya na nasa 14.97 porsyento, imbes na ang mas mababang rekomendadong rate na 8.27 porsyento.

Binigyang-diin niya na ang mataas na WACC ay nagresulta sa mas malaking singil sa mga konsyumer kaysa nararapat.

Ayon kay Hontiveros, ang pansamantalang rate na sinisingil ng MERALCO mula pa noong 2011 ay batay sa mataas na WACC na ito, na nagdulot ng sobrang bayarin para sa mga konsyumer.

Dagdag niya, “In effect, MERALCO benefited from its failure to comply with the Energy Regulatory Commission (ERC) order, resulting in the failure of the fourth regulatory period because it avoided imposing lower WACC.”

Samantala, binigyang-linaw ng tagapagsalita ng MERALCO na si Joe Zaldarriaga na walang kapangyarihan ang kumpanya na itakda ang WACC dahil ito ay isang tungkulin ng ERC.

Sinabi ni Zaldarriaga, “We have no power to determine the weighted average cost of capital (WACC) as this is a regulatory function.”

Ilang grupo ng mga konsyumer at dating opisyal ng ERC ang matagal nang bumabatikos sa mataas na WACC, at sinasabing ito ay higit na mataas kumpara sa mga kalapit-bansa tulad ng Malaysia, Thailand, at Indonesia. Sa Malaysia, ang WACC ay nasa 7.5 porsyento, sa Thailand ay 7.2 porsyento, at sa Indonesia ay 2.3 porsyento lamang.

Ayon kay dating ERC Commissioner Alfredo Non, dapat umabot sa P150 bilyon ang kabuuang refund na maibabalik sa mga konsyumer, batay sa mga over-recoveries na dulot ng mataas na WACC.

Patuloy na naninindigan si Hontiveros para sa mas malinaw at patas na proseso sa sektor ng enerhiya. Tinuligsa niya ang kumplikado at magulong sistema ng ERC sa pagtatakda ng mga rate na maaaring magdulot ng sobrang singil mula sa mga utility company.

“Magandang balita sana na bababa ang babayaran natin sa kuryente. Pero kung tutuusin, soli-bayad lang naman ito sa sobra nilang nasingil,” pahayag ni Hontiveros.

Ang isyu ng WACC ng MERALCO ay nagbigay-diin sa pangangailangan para sa mas mahigpit na pangangasiwa ng mga ahensyang tulad ng ERC. Sa patuloy na diskusyon, umaasa ang mga konsyumer sa mga hakbang na magdadala ng mas patas na singil sa kuryente at mas mataas na pananagutan mula sa sektor ng enerhiya.