ANG salitang “binalot” ay isang tradisyonal na paraan ng pagbabalot at paghahatid ng pagkain sa Pilipinas gamit ang dahon ng saging. Ito ay isang tradisyonal na pakete ng pagkain na ginamit maraming taon na ang nakalilipas sa kanayunan ng mga magsasaka at mga manggagawa o yung nagtatrabaho sa mga plantasyon. Ang salitang “binalot” ay isa ring ginustong sistema ng mga pamilya at indibidwal na kailangang pumunta sa malayuang paglalakbay noong araw. Makikita pa rin ito sa mga taong sumasakay sa mga bangka, jeepney, at bus sa kanayunan.

Ngayon, gayunpaman, ang salitang “binalot” ay isang pangalan na nauugnay sa mga restawran, at mga tagapagtustos ng “Ready-to-Eat” at “Ready-to-Cook” na pagkain. Tinatawag rin ito na moderning binalot. Paano nag-evolve ang “binalot” sa kalaunan? Ating suriin.

Sa panahon ng mga lockdown sa taong 2020, ang mga indibidwal at pamilya sa mga lungsod ay bumili ng pagkain na “Ready-to-Eat” o handa nang kainin na pagkain upang maiwasang mahawa ng COVID-19 na virus. Ang “Ready-to-Eat” ay isang halimbawa ng modernong binalot. Ang mga ito ay niluto ng “fast-food” na mga restawran, at direktang inihatid sa mga tahanan o opisina. Ang iba na may mga sasakyan ay gumagamit ng “drive-thru” para mag-order, kunin at iuwi ang kanilang pagkain. Ang iba naman ay tumatawag gamit ang cellphone para mag pa-deliver.

Ang “Ready-to-Eat” na pagkain na mabibili sa mga “fast-food” na restaurant, gayunpaman, ay itinuturing na hindi malusog lalo na kung kinakain araw-araw. Ipinakita ng mga pag-aaral sa United States (U.S.) na ang regular na pagkonsumo ng “fast-food” ay maaaring magresulta sa mga malalang sakit gaya ng diabetes, sakit sa puso, kanser, at iba pang problema sa kalusugan. Bakit? Ang mga pagkain at inumin na inuri bilang “fast-food” ay maaaring maglaman ng mas mataas na antas ng asin at asukal. Ginagamit ang asin bilang “food preservative” at panlasa. Tinatantya ng Cleveland Clinic sa U.S. na ang isang cheeseburger na may bacon, halimbawa, ay maaaring magkaroon ng humigit-kumulang 1.5 gramo ng asin. Ang pagkonsumo ng dalawang piraso ng cheeseburger na may bacon ay maaaring doble ang dami ng asin. Ang mas mataas na antas ng asin ay maaaring magpapataas ng presyon ng dugo. Inirerekomenda ng Philippine Heart Association na limitahan ang pagkonsumo ng asin sa maximum na dalawang gramo bawat araw, at iwasan ang mga inuming naglalaman ng asukal. Kung mas mababa ang pagkonsumo ng asin at asukal, mas mabuti.

Ang “Ready-to-Cook” o handa nang lutuin na pagkain ay isa pang halimbawa ng modernong binalot na mabibili sa mga grocery store at supermarket. Ang ilan ay frozen at dapat nasa freezer. Maaaring gumamit ng microwave o kalan upang mabilis na lutuin ang pagkain lalo na mga abalang nagtratrabaho. Ilan sa mga “Ready-to-Cook” na pagkain ay mga paborito natin tulad ng sisig, pork adobo, lechon paksiw, pork dinuguan, bopis, longaniza, tocino, chicken barbecue, at iba pa. Masarap ito. Ngunit dapat magingat. Tandaan na basahin ang label sa pakete ng “Ready-to-Cook” na pagkain. Suriin ang antas ng asin at magpasya sa ating paggamit.