SUGATAN ang isang 40-anyos na lalaki at menor de edad nitong anak na babae matapos na lumiyab ang sinasakyang motorsiklo sa Davao de Oro.

Ginagamot ngayon sa hospital ang mga biktima na nagtamo ng second degree burn sa katawan.

Batay sa ulat ng PNP, naganap ang insidente sa Barangay Camanlangan sa bayan ng New Bataan.

Ayon sa ulat, binabaybay ng mag-ama ang kalsada sa naturang barangay nang biglang magliyab ang kanilang motorsiklo.

Mabilis na kumalat ang apoy dahil sa gasolina kaya’t sunog ang katawan ng mag-ama.

Patuloy ang imbestigasyon sa aksidente.