MATAGUMPAY na nagtapos ang dalawang araw na bilateral negotiation sa Putrajaya, Malaysia noong Marso 4–5, 2026, na nagmarka ng mahalagang yugto sa pagpapatibay ng ugnayan sa aviation ng Pilipinas at Malaysia.

Ang kasunduan ay nagmomodernisa sa Air Services Agreement na nilagdaan noong 1978 upang umayon sa kasalukuyang kalakaran sa paglalakbay, kabilang ang pagbabagong alinsunod sa Public Service Act.

Sa ilalim ng bagong patakaran, kikilalanin na ang mga airline batay sa kanilang pangunahing lugar ng negosyo at hindi na lamang sa tradisyunal na pamumuhunan o pagmamay-ari. Dahil dito, mas maraming airline ang maaaring mag-operate ng mga ruta sa pagitan ng dalawang bansa. Inaasahang magdudulot ito ng mas mataas na kompetisyon, mas maraming pagpipilian para sa mga biyahero, at mas abot-kayang pamasahe.

Pinalalawak din ng kasunduan ang komersyal na kooperasyon sa pamamagitan ng joint ventures at codesharing upang makalikha ng mas maginhawa at tuluy-tuloy na karanasan sa paglalakbay.

Ang pinatibay na ugnayan sa aviation ay inaasahang magpapalakas sa turismo at ekonomiya, habang higit pang pinatatag ang ugnayan ng mamamayan ng dalawang bansa.

Pinangunahan ng Pilipinas ang delegasyon sa pamumuno ni Transportation Undersecretary Jim Sydiongco, kasama si CAAP Deputy Director General for Administration Atty. Danjun Lucas at Civil Aeronautics Board Executive Director Atty. Carmelo Arcilla.

Binigyang-diin ng CAAP na ang modernisasyon ng mga bilateral air agreement ay nagpapalakas sa kompetitibidad ng Pilipinas sa pandaigdigang sektor ng aviation, alinsunod sa direktiba ni Pangulong Ferdinand Marcos Jr. at ni Transportation Secretary Giovanni Lopez.