NAGPAHAYAG ng suporta ang mga senador sa panawagan ni Pangulong Ferdinand “Bongbong” Marcos Jr. na bigyang-prayoridad ang mahahalagang isyu na makapagpapabuti sa buhay ng mga Pilipino.

Kaugnay nito, naglabas ng pahayag ang mga senador kaugnay ng impeachment discussions laban kay Vice President Sara Duterte matapos sabihin ng Pangulo na huwag nang ituloy ang ganitong mga balak.

Sinabi nina Senate President Francis Chiz Escudero at Senate President Pro Tempore Jinggoy Estrada ang pangangailangan ng pagkakaisa at pagtutok sa mahahalagang isyu ng bansa.

Tumanggi si Escudero mag-komento sa mga usapin ng impeachment at binigyang-diin ang mahalagang papel ng Senado sa prosesong ito.

Sumang-ayon si Senate President Pro Tempore Jinggoy Ejercito Estrada sa posisyon ni Pangulong Marcos at tinukoy ang impeachment bilang isang prosesong politikal na maaaring magdulot ng pagkakawatak-watak.

“Impeachment is a political process, not a judicial one. Sang-ayon ako sa hindi pagtuloy ng impeachment.

There are many pressing problems in our country that need to be addressed not only by the two highest officials but also by us lawmakers,” ayon kay Estrada.

Sinabi pa ni Estrada na hindi dapat gamitin ang impeachment bilang kasangkapan para sa personal o partisan na layunin dahil lalo lang itong makakaabala sa pagtugon sa agarang pangangailangan ng mga Pilipino.

Nanawagan si Estrada ng pagkakasundo sa pagitan ng pinakamataas na lider ng bansa.

“Patuloy ko na ipagdarasal at hihilingin ko na rin ngayong Kapaskuhan na manaig ang reconciliation sa pagitan ng ating dalawang pinakamataas na lider para sa kapakanan ng ating mga kababayan,” aniya.

Nauna nang tinutulan ni Pangulong Marcos ang anumang impeachment moves laban kay VP Sara Duterte at hinimok ang mga mambabatas na tutukan ang mas mahahalagang usapin sa bansa.

Habang naghahanda ang Senado na talakayin ang mga mahahalagang panukalang batas bago matapos ang taon, nanawagan sina Escudero at Estrada ng maingat na pagkilos at pagtutok, pinagtitibay ang kahalagahan ng pagkakaisa at pananagutan sa pamahalaan.