NAHULI ng mga pulis ang isang obrero dahil sa pagdadala ng hindi lisensyadong baril sa Sampaloc, Manila noong Sabado.

Dinampot ang suspek na si alyas Laklak sa Lacson St., Brgy. 432, Zone 44, Sampaloc, ayon kina Police Corporal Jimmy Cawaling, Patrolman Kenneth Telewik at Patrolman Regie Rioflorido, bandang alas-10:15 ng gabi.

Bago dinala sa presinto, sumailalim muna sa medical examination ang suspek sa Ospital ng Sampaloc.

Nahaharap ang suspek sa kasong paglabag sa Republic Act 10591 (Comprehensive Firearms and Ammunition Regulation Act of 2013) matapos mahulihan ng .22 caliber revolver at apat na bala.