HULI man daw at magaling naihahabol din.

Nakamit ni Tokyo Olympics gold medalist Hidilyn Diaz-Naranjo ang kanyang matagal ng pangarap matapos makuha ang degree sa business administration, major in management, sa La Salle-College of St. Benilde nung Sabado.

Buong pagmamalaking inanunsyo ni Diaz, na gumawa ng kasaysayan matapos masungkit ang kauna-unahang Olympic gold medal ng bansa nung 2020, ang kanyang naabot na pangarap na makatapos ng pag-aaral sa kanyang social media page.

Ipinakita din niya ang kanyang graduation photos, na nakasuot ng toga.

“Nakakaiyak din pala. Not an ordinary day. Inabot din ng 16 years, nag-shift ng courses, nag-transfer ng school, nag-LOA dahil ang hirap pagsabayin ang pagwe-weightlifting at pag-aaral,” pahayag ni Diaz sa social media.

“Dreaming of graduating from college and earning a degree while preparing for the Olympics. Hindi ko akalain na magagawa ko, after sleepless nights and tiring days from training while attending school at De La Salle-College of St. Benilde. Posible pala,” pag-kwento pa niya.

Hinimok din ng 32-year-old pride ng Zamboanga ang mga kapwa student- athletes na ipagpatuloy ang kanilang pag-aaral sa kabila ng madaming nga pagsubok sa buhay.

“Kung nakaya ko, kaya din ng mga student-athletes, at mga bata at sa lahat na gusto makapagtapos, age doesn’t matter, mahirap pero super worth it. I never imagined reaching this point. But here I stand,” pahayag pa ni Diaz sa kanyang social media page.