ARESTADO ang dalawang babae na sangkot umano sa bentahan ng iba’t-ibang uri ng ilegal na droga sa Makati City at nakatakas ang kasabwat na lalaki sa buy-bust noong Biyernes.

Kinilala ang mga nadakip na sina alyas Lulu, 37; at alyas Pinky, 46.

Nakatakas naman ang kasabwat nilang kelot na si alyas Jake, 36.

Natiklo ang mga suspek ng makabili ng 101 na piraso ng plastic pop carts na may lamang disposable vape na naglalaman ng cannabis oil na may halagang P1,393,000 ang dalawang pulis ng Station Drug Enforcement Unit (SDEU) ng Makati police sa Brgy. Bel Air, Makati.

Nang tanggapin ng mga suspek ang markadong salapi, nakatunog na si alyas Jake na pulis ang ka-transaksyon.

Bukod sa ibinentang mga disposable vape na may lamang cannabis oil, nasamsam din sa mga suspek ang isa pang disposable vape na may laman ding cannabis oil na nagkakahalaga ng P7,500, 0.5 gramo ng shabu na nagkakahalaga ng P3,400, P4,250 na halaga ng ecstasy, ang markadong salapi na ginamit sa buy-bust, dalawang cellular phone at iba’t-ibang uri ng drug paraphernalia.

Umabot sa P1.4 milyon ang halaga ng mga ilegal na droga na nakumpiska sa dalawang bebot.