HUMIGIT-KUMULANG P4.564 bilyong halaga ng shabu at iba pang mapanganib na droga na nakumpiska ng mga ahente ng pamahalaan laban sa ilegal na droga ang winasak ng Philippine Drug Enforcement Agency (PDEA) sa isang espesyal na pasilidad sa Trece Martires City, Cavite noong Martes, ayon kay PDEA Director General at Undersecretary Isagani R. Nerez.

Si Kalihim ng Department of the Interior and Local Government na si Juanito Victor C. Remulla ang naging panauhing pandangal at tagapagsalita sa pagsira ng mga mapanganib na droga na nagkakahalaga ng P4,563,517,903.02 sa Integrated Waste Management Inc. (IWMI) sa Barangay Aguado, ayon sa opisyal.

Bilang bahagi ng pangako ng pamahalaan sa transparency at pananagutan sa publiko, kabuuang 1,136.5521 kilo ng solidong ilegal na droga at 657.1300 mililitro ng likidong ilegal na droga ang winasak sa pamamagitan ng thermal decomposition o thermolysis sa isang aktibidad na sinaksihan ng iba pang opisyal ng pamahalaan at sibilyan.

Kabilang sa mga winasak ay 555.2393 kilo ng methamphetamine hydrochloride o shabu; 442.9399 kilo ng marijuana; 1.6651 kilo ng MDMA o ecstasy; 117.3860 kilo ng cocaine; 15.8149 kilo ng ephedrine; at 0.5070 kilo ng ketamine. Kasama rin ang mga likidong sangkap tulad ng amphetamine, liquid meth, marijuana, toluene, at iba’t ibang isinukong expired na gamot.

Ayon kay Nerez, ang mga mapanganib na drogang ito ay nakumpiska mula sa iba’t ibang anti-drug operations na isinagawa ng PDEA katuwang ang iba pang law enforcement agencies na pinangungunahan ng Philippine National Police (PNP) sa ilalim ni General Jose Melencio C. Nartatez Jr., gayundin ang mga isinuko alinsunod sa utos ng korte para sa kanilang pagsira. \

Ang kanilang pagtatapon ay isinagawa matapos ang matagumpay na pag-uusig at resolusyon ng mga kasong kinasangkutan ng mga nasabing substansya bilang ebidensya.

Kabilang din sa mga winasak ang mahigit 43,000 gramo ng kush, isang mataas na uri ng marijuana derivative, at higit sa 102,000 gramo ng cocaine na natagpuang palutang-lutang sa baybayin ng mga coastal area sa Palawan mula huling bahagi ng nakaraang taon hanggang unang bahagi ng kasalukuyang taon.

“Patuloy ang PDEA sa pagpapalakas ng pakikipag-ugnayan at kooperasyon sa mga komunidad sa baybayin upang maiwasan ang smuggling ng droga sa karagatan, at pinupuri namin ang kanilang integridad sa agarang pagsuko ng anumang natagpuang lumulutang na droga,” ani Nerez.

Sa ilalim ng mahigpit na security protocols, ang mga nakumpiskang droga ay inilagay sa isang high-capacity incinerator at tuluyang sisirain nang hindi na maaaring mabawi sa loob ng 24 oras.

“Hindi tumitigil ang PDEA hindi lamang sa pagsamsam ng mga substansyang ito kundi pati sa pagtiyak na kapag naalis na ang mga ito sa kalsada, ay tuluyan na silang mawawasak,” dagdag ni Nerez.

Dagdag pa niya, ang quarterly na pagsira sa mga nakumpiskang droga ay isinasagawa sa harap ng publiko upang maiwasan ang anumang posibilidad ng pagrerecycle at mapanatili ang tiwala ng mamamayan.

“Ang aming mga proseso ay sadyang bukas at mahigpit na mino-monitor dahil nararapat lamang sa mamamayang Pilipino ang ganap na transparency. Ito ay naaayon sa bisyon ng Bagong Pilipinas ni Pangulong Ferdinand R. Marcos Jr., kung saan ang integridad, pananagutan, at maagap na aksyon ang naglalarawan sa pamamahala,” diin ng pinuno ng PDEA.