ARESTADO ang 13 drug suspects matapos makumpiska sa kanila ang tinatayang P693,600 na halaga ng shabu sa buy-bust sa Quezon City sa loob ng 24-oras.

Sa report kay Quezon City Police District (QCPD) Director P/Col. Melecio Buslig, Jr. naaresto ng Project 6 Police Station (PS 15) ang suspek na si alias Mantelo, 33, sa 4 Fisheries St., Brgy. Vasra at nakumpiska ang 70 gramo ng shabu na nagkakahalaga ng P476,000.

Nadakip sa isa pang operasyon ng Novaliches Police Station (PS 4) si alias Hufancia, 45, at Estoesta, 20, sa kanto ng Pablo Dela Cruz St. at De Guzman St. sa Brgy. San Bartolome at nakunan ng 15 gramo ng shabu na nagkakahalaga ng P102,000.

Samantala, 10 pang drug suspect ang nadakma sa iba’t-ibang operasyon ng QCPD na nagresulta sa pagkakakumpiska ng P115,600 na halaga ng shabu.

Kakasuhan ang mga suspek ng paglabag sa RA 9165 (Comprehensive Dangerous Drugs Act of 2002) habang karagdagang kasong paglabag sa Article 151 ng Revised Penal Code o ang Resistance and Disobedience to a Person in Authority ang isasampa laban kina Estoesta at Hufancia.