PALAISIPAN sa mga pulis ang babaeng estudyante na natagpuang patay matapos bumagsak galing sa ikaapat na palapag ng kanilang campus sa College of Industrial Education building sa Ayala Blvd corner San Marcelino St., Ermita, Manila noong Biyernes.

Nakilala ang biktima na si alyas Mich, 23, ayon sa police report.

Ayon kay Police Capt. Dennis Turla, hepe ng Manila Police District homicide section, bandang alas-9:23 ng umaga ng maganap ang insidente.

Base sa investigation ni PMSg Roderick Magpale, sinabi ng naka-duty na security personnel na ang biktima mag-isang naglalakad sa corridor ganap na ala-9:22 ng umaga.

Makalipas ang isang minuto, nakuhanan din ng isa pang footage mula sa 3rd floor camera ang pagbagsak ng biktima matapos mahulog ito sa gitna ng atrium.

Dahil dito, itinawag ang insidente sa security office ng nasabing paaralan.

Tinawag din ang school nurse para sa emergency medical intervention at isinugod din sa Manila Doctor’s Hospital ang biktima kung saan idineklarang dead-on-arrival ang estudyante.

Sa on-site investigation, napansin ang isang upuan at railings ng balkonahe.

Ang upuan ang pinaniniwalaang ginamit ng biktima para sumampa at lumukso sa taas na 40 feet.