𝗕𝗜𝗟𝗔𝗡𝗚 𝗶𝘀𝗮 𝘀𝗮 𝗺𝗴𝗮 𝗮𝗱𝘃𝗼𝗰𝗮𝘁𝗲𝘀 𝗻𝗴 “𝗮𝗻𝘁𝗶-𝗣𝗢𝗚𝗢” 𝘀𝗮 𝗯𝗮𝗻𝘀𝗮 𝗼 𝗺𝗮𝘀 𝗸𝗶𝗹𝗮𝗹𝗮 𝗯𝗶𝗹𝗮𝗻𝗴 𝗣𝗵𝗶𝗹𝗶𝗽𝗽𝗶𝗻𝗲 𝗢𝗳𝗳𝘀𝗵𝗼𝗿𝗲 𝗚𝗮𝗺𝗶𝗻𝗴 𝗢𝗽𝗲𝗿𝗮𝘁𝗼𝗿𝘀 s𝗶𝗻𝘂𝘀𝘂𝗽𝗼𝗿𝘁𝗮𝗵𝗮𝗻 𝗻𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝗮𝗻𝗴 𝗽𝗮𝗴𝗹𝘂𝗹𝘂𝗻𝘀𝗮𝗱 𝗻𝗴 𝗶𝘀𝗮𝗻𝗴 𝗺𝗮𝗹𝗮𝘄𝗮𝗸𝗮𝗻𝗴 𝗰𝗿𝗮𝗰𝗸𝗱𝗼𝘄𝗻 𝗮𝘁 𝘁𝘂𝗹𝘂𝘆𝗮𝗻𝗴 𝗽𝗮𝗴𝗽𝗮𝗽𝗮𝗵𝗶𝗻𝘁𝗼 𝘀𝗮 𝗼𝗽𝗲𝗿𝗮𝘀𝘆𝗼𝗻 𝗻𝗴 𝗣𝗢𝗚𝗢.

Ayon ito kay Valeriano, chairperson ng House Committee on Metro Manila Development, kasunod ng naging surpresang anunsiyo ni President Ferdinand “Bongbong” R. Marcos, Jr. sa kaniyang ikatlong State of the Nation Address (SONA) kaugnay sa total ban ng POGO sa Pilipinas.

Binigyang diin ni Valeriano na dapat simulan na rin ng pamahalaan ang tuluyang pagbubuwag o paglalansad dito sa pamamagitan ng isang malawakang crackdown.

Ikinatuwiran ni Valeriano na ang binitiwang pahayag ng Pangulo sa kaniyang SONA ang hudyat para kumilos na ang mga awtoridad para simulan ang isang malawakang paglansag sa operasyon ng POGO na naglipana sa iba’t-ibang lugar sa Pilipinas.

Sabi ng kongresista na kinakailangang maipakita at maiparamdam ng gobyerno ang kamay na bakal laban sa mga Chinese nationals na nagdala ng POGO sa bansa. Sapagkat pagpapakita lamang ito na hindi sumasang-ayon ang mga Pilipino na lantaran at harap-harapang nilalapastangan ng mga Intsik ang batas ng Pilipinas.

Dahil dito, muling iginiit ni Valeriano na kailangan talagang manindigan ng Pilipinas laban sa POGO bunsod ng samu’t-saring kriminalidad na idinudulot nito kabilang na ang kidnapping, human trafficking, bentahan ng illegal na droga, pagpatay o murder at torture.

Dagdag pa ng Manila solon, isang “marching order” ang ibinigay ng Pangulong Marcos, Jr. laban sa POGO sa kaniyang SONAmkung kaya’t hindi na dapat magpatumpik-tumpik pa si Presidential Anti-Organized Crime Commission (PAOCC) Chief Gilbert Cruz at simulan na ang paglansag sa POGO.

Ayon pa kay Valeriano, kabilang din sa mga ahensiyang inaasahan nitong mangunguna sa paglulunsad ng total crackdown ay ang Philippine Amusement and Gaming Corporation (PAGCOR), Department of Foreign Affairs (DFA), Department of Justice (DOJ), Bureau of Immigration (BI), Anti-Money Laundering Council (AMLAC) at Department of Labor and Employment (DOLE).

Binigyang diin pa ni Valeriano na hindi sapat ang paglalansag at pagpapalayas lamang sa operasyon ng POGO sa Pilipinas. Kundi ang pagsasampa ng kaso at maparusahan ang mga Chinese nationals na lumabag sa batas ng Pilipinas na nasangkot sa iba’t-ibang uri ng krimen.