𝗜𝗞𝗜𝗡𝗔𝗚𝗔𝗟𝗔𝗞 𝗻𝗴 c𝗵𝗮𝗶𝗿𝗺𝗮𝗻 𝗻𝗴 𝗛𝗼𝘂𝘀𝗲 𝗖𝗼𝗺𝗺𝗶𝘁𝘁𝗲𝗲 𝗼𝗻 𝗣𝗼𝘃𝗲𝗿𝘁𝘆 𝗔𝗹𝗹𝗲𝘃𝗶𝗮𝘁𝗶𝗼𝗻 𝗻𝗮 𝘀𝗶 𝟭-𝗣𝗔𝗖𝗠𝗔𝗡 𝗣𝗮𝗿𝘁𝘆 𝗟𝗶𝘀𝘁 𝗥𝗲𝗽. 𝗠𝗶𝗰𝗵𝗮𝗲𝗹 “𝗠𝗶𝗸𝗲𝗲” 𝗟. 𝗥𝗼𝗺𝗲𝗿𝗼, 𝗣𝗵.𝗗., 𝗮𝗻𝗴 𝗻𝗮𝗴𝗶𝗻𝗴 𝗽𝗮𝗴𝘁𝘂𝗴𝗼𝗻 𝗻𝗴 𝗺𝗴𝗮 𝗴𝗼𝗯𝗲𝗿𝗻𝗮𝗱𝗼𝗿 𝗯𝘂𝗵𝗮𝘁 𝘀𝗮 𝗶𝗯𝗮’𝘁-𝗶𝗯𝗮𝗻𝗴 𝗹𝗮𝗹𝗮𝘄𝗶𝗴𝗮𝗻 𝗸𝗮𝘂𝗴𝗻𝗮𝘆 𝘀𝗮 𝗶𝗯𝗶𝗻𝗶𝗴𝗮𝘆 𝗻𝗮 𝗵𝗮𝗺𝗼𝗻 𝗻𝗶 𝗛𝗼𝘂𝘀𝗲 𝗦𝗽𝗲𝗮𝗸𝗲𝗿 𝗙𝗲𝗿𝗱𝗶𝗻𝗮𝗻𝗱 𝗠𝗮𝗿𝘁𝗶𝗻 𝗚𝗼𝗺𝗲𝘇 𝗥𝗼𝗺𝘂𝗮𝗹𝗱𝗲𝘇 𝘂𝗽𝗮𝗻𝗴 𝗺𝗮𝗴𝗹𝘂𝗻𝘀𝗮𝗱 𝗻𝗴 𝗶𝘀𝗮𝗻𝗴 𝗺𝗮𝗹𝗮𝘄𝗮𝗸𝗮𝗻𝗴 𝗸𝗮𝗺𝗽𝗮𝗻𝘆𝗮 𝗽𝗮𝗿𝗮 𝗹𝗮𝗯𝗮𝗻𝗮𝗻 𝗮𝘁 𝗽𝘂𝗸𝘀𝗮𝗶𝗻 𝗮𝗻𝗴 𝗸𝗮𝗵𝗶𝗿𝗮𝗽𝗮𝗻 𝘀𝗮 𝗸𝗮𝗻𝗶-𝗸𝗮𝗻𝗶𝗹𝗮𝗻𝗴 𝗹𝘂𝗴𝗮𝗿.

Ayon kay Romero, napaka-positibo ang naging pagtugon ng mga gobernador sapagkat mismong sila ay nagpahayag ng kanilang kahandaan na makipag-tulungan sa pamahalaan upang wakasan ang laganap na kahirapan sa kanilang sariling lalawigan sa pamamagitan ng paglulunsad ng mga programang makakatulong sa mga kapos-palad na mamamayan.

Paliwanag ni Romero na hindi kakayanin ng gobyerno ang kampanya kontra kahirapan kung walang suporta at kooperasyon mula sa local government units (LGUs) partikular na sa mga lalawigan na ramdam ang kahirapan dahil hindi naaabot ng tulong mula sa pamahalaan.

Dahil dito, pinapurihan ng chairperson ng House Committee on Poverty Alleviation ang mga provincial governors dahil sa ipinakita nilang commitment kay Speaker Romualdez para tulungan ang Pangulong Ferdinand “Bongbong” R. Marcos, Jr. sa kampanya nito laban sa kahirapan at iba pang problemang kinakaharap ng bansa.

Aminado si Romero na isang napaka-seryosong problema ang kahirapan kaya nararapat lamang na magkaroon ng konkretong hakbang para masolusyunan ang naturang problema sa pamamaraan ng pagtutulungan ng lahat ng sangay ng pamahalaan kasama na ang LGUs.

Sabi pa ni Romero na hindi lamang sa iisang lugar nararamdaman ang kahirapan kundi sa buong bansa lalo na sa mga lugar na hindi nakakarating ang tulong at ayuda mula sa pamahalaan. Kaya kailangan talaga aniya ang pakikipagtulungan ng mga gobernador ng iba’t-ibang lalawigan.