IPINAGMAMALAKI ng National Bureau of Investigation (NBI) na ginawaran ito ng Plaque of Recognition sa ginanap na Presidential and NACC Recognition Ceremony sa Palasyo ng Malacañang noong Mayo 5.

Pinangunahan ni Pangulong Ferdinand R. Marcos Jr. ang Recognition Ceremony ng Presidential and National Anti-Money Laundering, Counter-Terrorism Financing, Counter Proliferation Financing Coordinating Committee (NACC), na pinarangalan ang mga indibidwal at institusyon na ang mga pagsisikap ay naging instrumento sa pagtiyak na matanggal ang Pilipinas sa Financial Action Task Force (FATF) “grey list.”

Itinampok sa parangal ang napakahalagang kontribusyon, pambihirang dedikasyon at hindi natitinag na pangako ng ahensya sa pagsulong at pagpapatupad ng mga pangunahing reporma sa Anti-Money Laundering at Counter-Terrorism Financing framework ng bansa.

Bukod sa pagkilala ng NBI, nakatanggap si NBI Director Jaime B. Santiago ng Commendation Award mula sa Office of the President. Gayundin ang mga tauhan ng NBI na sina Atty. Darcy M. Binayan, acting chief ng Counter-Terrorism Division; Atty. Minerva Sobreviga-Retanal, supervising agent ng Fraud and Financial Crimes Division; Atty. Catherine Camposano-Remigio, executive officer sa Violence Against Women and Children Division; Atty. Madrino A. De Jesus, supervising agent ng International Airport Investigation Division; Atty. Van Homer Angluben, executive officer sa Cybercrime Division; Atty. Joseph Eufemio S. Martinez, team leader ng NBI-National Capital Region; Atty. Emelito O. Santos Jr., supervising agent ng Laguna District Office; at Rehom P. Pimentel, investigation agent III ng Organized and Transnational Crimes Division.

Ipinahayag ni Pangulong Marcos Jr. na kabilang sa mga pangunahing prayoridad ng administrasyon ay ang palakasin ang kredibilidad ng sistema ng pananalapi ng bansa, kaya’t isang malubhang balakid ang pagkakasama ng Pilipinas sa FATF “grey list” noong 2021.

Noong Oktubre 16, 2023, ang lahat ng kinauukulang ahensya ng gobyerno, sa pamamagitan ng Memorandum Circular No. 37, ay inatasan na agad at komprehensibong tugunan ang natitirang international cooperation review group action plan item.

Noong Enero 2, 2024, nanawagan ang Pangulo sa lahat ng stakeholder at inatasan silang magsagawa ng serye ng mga teknikal, legal at mga reporma sa pagpapatakbo.

Noong Oktubre 2024, naisara ng NACC ang mga pagkukulang at noong Pebrero 2025 ay pormal na inanunsyo ng FATF ang pag-alis ng Pilipinas sa “grey list,” isang napakahalagang tagumpay na idiniin ni Pangulong Marcos Jr.

Sinabi ng Pangulo na ang paglabas sa grey list ay nangangahulugan ng isang mas simple, mas abot-kayang sistema ng transaksyon sa pananalapi, kung saan ang mga overseas Filipino worker (OFW) ay makapagpapadala ng pera sa mas mababang halaga.

Idinagdag niya na sa pangkalahatan ay nangangahulugan ito ng mas malakas na pananggalang laban sa money laundering at pagpopondo ng terorista.

“Hindi pa tapos ang trabaho. Patuloy ang paglalakbay. Higit sa lahat, kailangan ang dobleng pagsisikap upang mapanatili ang nakamit na natin. Dapat magsumikap pa para ma-institutionalize ang mga reporma. Dapat mas maging mahigpit tayo laban sa money laundering at terrorism financing. Dapat palakasin natin ang sistema ng pananalapi upang makayanan ang mga hamong mas sopistikado at technologically advanced na kinakaharap ng financial sector. Ang hamon sa ating lahat ay huwag hayaang muling malagay ang ating bansa sa grey list,” pagtatapos ni Pangulong Marcos Jr.