PORMAL ng isinalin ni outgoing Southern Police District (SPD) chief P/BGen. Bernard Yang ang pamumuno sa distrito kay incoming Director P/BGen. Manuel Abrugena sa SPD headquarters noong Sabado sa Taguig City.

Nanguna sa pagpapalit ng kapangyarihan si National Capital Region Police Office (NCRPO) Acting Director P/BGen. Anthony Aberin.

Dumalo rin sa seremonya si Manila Police District (MPD) Director P/BGen. Arnold Thomas Ibay, kinatawan ng Special Action Force (SAF), mga hepe ng pulisya ng anim na lungsod at isang bayan na nasa ilalim ng kapangyarihan ng SPD.

Pinasalamatan ni BGen Yang ang suportang ipinagkaloob sa kanya ng mga opisyal at tauhan sa panahon ng kanyang panunungkulan. Mauupo si BGen Yang bilang Officer-in-Charge ng PNP Anti Cybercrime Group.

Sinabi naman ni BGen. Abrugena na pagsisikapan niyang maging matagumpay ang kanyang layunin sa hinaharap ng SPD na tututok sa pagpapalakas ng ugnayan sa bawa’t komunidad at epektibong paraan ng pagsugpo sa krimen na naka-linya sa triple A na binalangkas ng pinuno ng NCRPO.