ISINULONG ni Senador Sherwin Gatchalian ang pagtanggal ng mga lump sum na alokasyon sa panukalang pondo ng National Irrigation Authority (NIA) upang matiyak ang mas malinaw na pagsusuri at pagsubaybay sa mga proyekto ng patubig sa buong bansa.

“Isa pang pananggalang na ipinatupad natin sa budgeting process ay ang pagtanggal ng lump sums. Para hindi na mangyari uli ‘yung ghost projects, ang layunin ay magtatag ng line items at tiyakin na malinaw na matukoy ang eksaktong coordinates at ang tiyak na haba ng mga irrigation projects,” sabi ni Gatchalian habang tinatalakay sa plenaryo ng Senado ang budget ng NIA.

Dagdag pa niya, “Masusundan na ng ating mga kababayan kung meron at anong irrigation projects ang itinatayo sa kanilang mga lugar.”

Bilang chairperson ng Senate Committee on Finance, pinuna ni Gatchalian ang mahigit P26 bilyong lump sum sa panukalang pondo ng NIA na binubuo ng P10 bilyon para sa national irrigation systems, P5 bilyon para sa communal systems, P630 milyon para sa iba pang sub-programs, P851 milyon para sa expansion projects, P4 bilyon para sa pump irrigation, at P2 bilyon para sa special irrigation programs.

Layunin ng pagbabagong ito na maiwasan ang mga “ghost projects” at mapanatili ang tamang paggamit ng pondo ng bayan, lalo na sa sektor ng agrikultura. Inaasahan ding magdudulot ito ng mas mahusay na pamamahala at pananagutan sa mga proyektong pinopondohan ng gobyerno.

Ang NIA ay nasa ilalim ng Department of Agriculture at pangunahing nangangasiwa sa mga patubig na tumutulong sa mga magsasaka. Ang pagtitiyak ng transparency sa pondo ng ahensya ay mahalaga upang makarating ang benepisyo ng mga proyekto sa mga komunidad na umaasa sa patubig para sa kanilang kabuhayan.