PINAPURIHAN ni Senador Sherwin Gatchalian ang panawagan ni Pangulong Ferdinand R. Marcos Jr. sa mga lokal na pamahalaan (LGUs) na bigyang prayoridad ang mga programang pang-nutrisyon, partikular na para sa mga buntis na ina na nasa panganib at mga batang nasa murang edad.

Ayon kay Gatchalian, mahalaga ang wastong nutrisyon sa pagpapatibay ng pundasyon ng mga mag-aaral at ito ay nangyayari sa panahon ng pagbubuntis ng isang babae. Ang hakbangin na ito ay pagtugon din sa suliraning pang-edukasyon ng bansa lalot apektado ang kabataan sa puntong ito.

“I fully support the President’s call for local governments to invest in nutrition for at-risk pregnant mothers and their children’s first 1,000 days,” pahayag ni Gatchalian. “Proper nutrition is key to strengthening learners’ foundations and addressing our education crisis.”

Binanggit ng senador na ang utos ng Pangulo sa Department of the Interior and Local Government (DILG) na isama ang pangangalaga sa kalusugan at nutrisyon bilang pangunahing pamantayan sa Seal of Good Local Governance (SGLG) ay naaayon sa mga panukalang batas na naglalayong palakasin ang maagang pag-aalaga sa mga bata.

Binigyang-diin niya na ang ratipikadong Early Childhood Care and Development (ECCD) System Act ay may probisyong nagsasama ng ECCD indicators sa mga pamantayan ng SGLG.

“This aligns with our proposal, which was adopted in the ratified Early Childhood Care and Development System Act, where Early Childhood Care and Development (ECCD) indicators shall be incorporated in the Relevant Assessment Criteria under the SGLG,” paliwanag niya.

Bukod sa pagsuporta sa mga polisiya, iginiit ni Gatchalian ang kahalagahan ng pagpapakilos sa mga LGU upang maihatid ang mga programa at serbisyong ECCD, kabilang ang mga inisyatibong pang-nutrisyon at pangkalusugan. Binigyang-diin niya na ang mga hakbang na ito ay mahalaga upang matiyak ang kakayahan ng mga estudyanteng matuto nang epektibo.

“Mahalagang bigyan natin ng matatag na pundasyon ang kalusugan ng ating mga mag-aaral dahil nakasalalay dito ang kanilang kakayahang matuto,” dagdag niya.

Sa isang talumpati kamakailan, nanawagan si Pangulong Marcos sa mga LGU na maglaan ng pondo para sa mga programang pang-nutrisyon, partikular na sa unang 1,000 araw ng buhay ng isang bata. Ayon sa Pangulo, ang paglaban sa malnutrisyon ay isang mahalagang hakbang upang masiguro ang kinabukasan ng bansa. Pinuri rin niya ang mga LGU na matagumpay na nagpatupad ng mga programang pang-nutrisyon at hinikayat ang iba pang mga lokal na pamahalaan na gayahin ang kanilang mga best practices.

Bilang suporta sa mga hakbanging ito, inilunsad ng gobyerno ang ilang mga programa, kabilang ang Walang Gutom 2027: Food Stamp Program, na nagbibigay ng food credits sa mga pamilyang may mababang kita, at ang pinalawak na Pantawid Pamilyang Pilipino Program (4Ps), na may buwanang tulong-pinansyal para sa mga pamilya na may buntis na ina o maliliit na bata.

Ang adbokasiya ni Gatchalian para sa mas matibay na lokal na interbensyon ay nagpapatibay sa mga pambansang inisyatiba, na nagpapakita ng mahalagang papel ng mga lokal na pamahalaan sa pagbibigay ng pangunahing serbisyo upang mapabuti ang kalusugan at pag-unlad ng mga kabataang Pilipino.