INIUTOS ng House Committee on Justice noong Miyerkules ang pagpapalabas ng subpoena sa National Bureau of Investigation (NBI) upang makuha ang mga rekord kaugnay ng umano’y mga banta na ginawa ni Bise Presidente Sara Z. Duterte laban kay Pangulong Ferdinand R. Marcos Jr., Unang Ginang Liza Araneta-Marcos, at dating Speaker Ferdinand Martin G. Romualdez.

Pinamunuan ni committee chair Gerville “Jinky Bitrics” Luistro ng Batangas ang pagpapalabas ng subpoena habang pormal na sinimulan ng komite ang mga pagdinig ukol sa mga reklamong impeachment laban kay Duterte, na siyang hudyat ng pagsisimula ng proseso upang matukoy kung may sapat na batayan (probable cause) upang iakyat ang kaso sa Senado para sa paglilitis.

Ang mosyon, na inihain ni Manila Rep. Joel Chua, ay humihiling ng mga sertipikadong kopya ng lahat ng rekord, dokumento, at mga larawan na nakalap sa imbestigasyon ng NBI tungkol sa nasabing mga banta.

Ang mga umano’y banta ay ginawa sa isang press conference noong Nobyembre 2024 kung saan sinabi ni Duterte na nag-utos umano siya sa isang indibidwal na patayin si Pangulong Marcos, ang Unang Ginang, at noon ay Speaker na si Romualdez sakaling siya ay mamatay—isang pahayag na nagdulot ng pangamba sa publiko at nag-udyok ng imbestigasyon ng mga awtoridad.

Bahagi ang mga ito ng mga batayang binanggit sa mga reklamong impeachment, kasama ang mga paratang ng pagtataksil sa tiwala ng publiko, paglabag sa Konstitusyon, maling paggamit ng mga kumpidensyal na pondo, at hindi maipaliwanag na yaman.

Iniharap ni Luistro ang mosyon sa komite para sa pag-apruba.

“May mosyon na maglabas ng subpoena sa National Bureau of Investigation kaugnay ng mga rekord ng imbestigasyon sa mga bantang ginawa ng Bise Presidente laban sa Pangulo, sa Unang Ginang, at sa dating Speaker. May magse-segundo ba?” ani Luistro.

Dahil walang tumutol, naaprubahan ang mosyon.

“Walang tumutol, ang mosyon ay aprubado. Inaatasan ang Committee Secretary na ilabas ang kinakailangang subpoena,” dagdag niya.

Inaatasan ng subpoena ang NBI na magsumite ng mga sertipikadong kopya ng lahat ng materyales na nakalap sa kanilang imbestigasyon, na rerepasuhin ng mga mambabatas bilang bahagi ng proseso ng pangangalap ng ebidensya ng komite.

Nauna nang natukoy ng justice panel na sapat sa anyo at nilalaman ang dalawang reklamong impeachment laban kay Duterte at pinahintulutan itong ipagpatuloy ang mga pagdinig kahit panahon ng recess ng Kongreso.

Sa yugtong ito, tinutukoy pa lamang ng komite kung may sapat na batayan (probable cause)—hindi ang pagkakasala—habang ang anumang paglilitis ay isasagawa sa Senado, na magsisilbing impeachment court.